市場徐想：農行增值業務有作為

成日走出走入神州大地，都會發覺依家內銀開到通街都係，祖國嘅金融服務業已經進入高速發展嘅階段。咁多間內銀嚟講，農業銀行（01288）近年積極改革，有機會喺未來幾年突圍而出。

農行近年努力改革既有業務，除咗存貸款業務，集團其中一個優勢就係業務多元化同地道化。近年農行積極爭取擴張結算業務及投資銀行業務，呢幾種業務正係現今銀行業嘅增長動力來源。農行現金管理交易量達51萬億元人民幣，較○九年增長55.4%，其現金管理客戶包括中國企業500強入面嘅44%客戶及100強入面嘅60%客戶。

投資銀行業務方面，去年農行的投行業務收入100.55億元人民幣，增長69.4%。加上近年完成嘅財務顧問業務平台第二期，以及佢嘅財務顧問專家系統，相信未來幾年，佢嘅購併貸款、購併重組、改制上市、投融資等等專業性高增值投行業務，更會領先同儕！以一間高增長企業嚟講，7.9倍市盈率絕對唔貴，將來定有一番作為！