四叔山頂屋愈「發」愈有

恒地（00012）四叔李氏家族舊年用私人名義投得嘅山頂白加道35號，雖然舊年年底已經獲屋宇署批建3幢大屋，不過，劉Sir發現，原來項目喺上個月又批咗另一份則，總樓面有成26,908方呎，比起之前多咗3,158方呎，估計連埋獲豁免嘅發水樓面，每幢大屋樓面最少有成1萬呎。

根據屋宇署資料，白加道35號舊年年底已經獲准興建3幢3層高洋房，總樓面約23,750方呎，上個月嘅最新獲批方案做咗唔少改動，總樓面就增加咗約13.3%至26,908方呎，仲多咗個1層高嘅更亭同休憩設施。

批則38份 四個月最多

屋宇署上個月批咗38份圖則，係近四個月最多，當中涉及22項住宅及商住發展，唔少係港島超級豪宅項目，除咗上述白加道35號外，會德豐（00020）位處山頂種植道1號嘅洋房項目，亦獲准興建20幢3層高洋房及2幢1層高配套設施，為近年區內大規模同類發展；另科達地產南區淺水灣道111及115號亦准建1幢27層高住宅，兩項目市場料市值合共逾120億元。

其中規模較大嘅項目，有新地（00016）舊年以108億元投到嘅前山谷道邨2期項目，項目作修訂，准建7幢3層高洋房，較之前減2幢，另有7幢20至25層高住宅，總樓面86.92萬方呎。