Fundman睇市：農行仍有挾淡倉空間

近期晚晚睇住外電關於歐盟峰會報道，的確係一步一驚心，難以想像一個關乎整個歐洲金融穩定的重要會議，會恍如細路仔鬧交一樣，一陣傳法國總統薩爾科齊不滿英國首相卡梅倫，話後者並非歐元區成員無資格指指點點，轉頭德國總理默克爾聯袂薩爾科齊，暗指意大利總理貝盧斯干尼，在削減財赤措施上立場「軟皮蛇」，但無論你信唔信歐盟峰會今晚可以達成終極拯救歐債危機方案，反正大孖沙見八、九月插到插唔落，惟有選擇信住先。

截至上星期三，基金經理可以「突然樂觀」，風險胃納大增，新興市場高息債券錄得32億美元淨流入，唔單止係十二個星期以來首次，以金額計，仲係○三年以來最多，可惜股票基金客戶睇住八、九月報表，唔少已按捺不住，唔等十月底贖回死線，Long only（長倉基金）截至上周三錄得15億美元淨流出，是連續第七個星期，即使G20真係有奇迹，好多基金投資者都可能享受唔到任何好處。

50日線後市關鍵

港股昨日大部分時間牛牛皮皮，在18,800至18,940點之間上落，直到收市前半小時，好友發難挾高內銀及石油等重磅股份，將恒指推到接近萬九點關口收市，恒指升196點，報18,968點，期指炒高水收19,020點，沽空佔大市成交比例由7.73%微升至8.28%。五月至今恒指幾次反彈到50日線樓上，都係停兩三日就掉頭回落，尋日收市終於突破這重要阻力（昨天在18,942點），未來兩日能否守穩，對後市相當關鍵。

早兩星期，證券業界仲嘈緊要限制沽空，大市反彈近三千點後，通通轉晒靜音模式。沽空對證券業嚟講，唔應該視為洪水猛獸，有貨可借的，可以透過借貨畀人賺點利息，大孖沙的長短倉套戥，證券經紀可以賺多點交易佣金，至於股價，雖然話沽空盤會令股價帶來一點壓力，可是掉番轉，當基金補空倉，一樣可以擴大股價升幅，故史提芬舉腳贊成，研究中央借貨的可行性，將沽空擴大到散戶層面，等沽空唔再係大戶獨享權利。

講開沽空，重災區肯定係內銀股，皆因通街芬佬都賭中國地方債問題爆煲，尋日末日博士魯賓尼話中國經濟三年內硬着陸，但今時今日，芬佬只係睇住年尾條數掂唔掂，三年後發生咩事，關人！

內銀股派第三季業績前夕，冚倉活動持續，最多空軍集結的農行（01288），升0.13元報3.2元，輾轉大半個月，由低位2.26元反彈近一蚊，市值過萬億炒到好似二三線股一樣，認真誇張。

農行上半年賺666.7億元（人民幣．下同），今日出第三季成績表，大行預測幅度頗參差，介乎308億至502億元，中位及平均數係352.4億及372.6億元，全年預測則賺1,287.3億元，市盈率6.6倍。不過，內銀估值意義已經唔大，因為全行估明年資產及貸款質素轉差，壞帳撥備會令盈利從一一年的高峰滑落。

由炒賣角度，農行沽空高峰期在八月份出現，最勁的八月廿六日沽空佔成交比例去到54.5%，八月沽空密集區在3.7港元至3.95港元左右，博反彈的股民可作為參考。