股海實戰：中港零售股高估值告終

重大消息前缸邊友愈係謹慎，大戶就繼續全力追擊淡友，恒指尋日叩萬九點關不果，全日高位18,981點，收報18,968點，升196點，收回價萬九點嘅恒指熊證暫可幸免於難，但過唔過到今日就唔知！現貨成交依然淡靜，只有601億元。如今金魚缸僅餘大鱷互片，今晚歐盟峰會有結果後，話唔定魚缸又再大變天，呢啲市一於繼續唔做唔錯！

股份方面，內銀股喺業績前繼續靠穩，反觀兩隻零售股公布完業績後股價齊齊「見光死」，其中利信達（00738）跌13.6%，收報3.11元，成交1,555萬元；I.T（00999）挫16.38%，報4.8元，成交3.99億元。

先講主力做服裝零售嘅I.T，市場對其中績（截至八月底止）甚為不滿，主要係純利同比增長40%至1.518億元，但中期息卻由去年同期嘅4.2仙大幅降至2.5仙。另外，公司存貨周轉期同比增25%至177天，銷售成本及經營開支各增六成，公司並由去年二月淨現金1.81億元轉為淨債務1,670萬元，令人關注公司毛利率表現、存貨高企以及擴展業務步伐過急對財務造成影響，股價回落至現水平，尚說不上特別便宜。

利信達存貨期延長

再睇專做鞋履零售業務嘅利信達，截至八月底止中期純利7,001萬元，同比增長15.9%，中期息增16%至每股5仙，股價照樣捱沽，除咗純利增幅一般之外，期內同店銷售增長僅12.5%，未達15%嘅增長目標，而存貨周轉期同比上升22%至210日，都成為沽售藉口。

管理層解釋，存貨周轉期上升，與積極拓展新店有關，但考慮到下半年外圍環境波動，九月起已積極清理存貨。另外，九至十月上旬，同店銷售增長較上半年佳，香港及中國增幅分別達20%及15%，且看下半年度能否追上。

中港零售股面對同店銷售增長放慢、存貨周轉期延長、銷售成本及經營開支上升嘅現象，似乎並非偶然。老實講，齋做香港，市場太細，且明年本港經濟增長放緩可能性增；做其他市場，出口歐、美根本冇得做；北望神州，一味靠鬥快開分店嘅擴張策略，資本風險趨升，再睇今年以來內地體育用品股亦飽嘗近年過度擴張所帶來嘅苦果。總括而言，嚟緊中港零售股嘅挑戰甚多，高估值嘅日子暫告一段落，須重回基本步，未到超抵價，最好咪亂動手！