低息環境 善借 「未來錢」

又到交稅季節，大家見到綠色信封時真係百感交集，咁辛苦賺番嚟嘅錢，當然想慳得就慳㗎啦；再加埋個預繳，有時真係令人抖大氣！睇番依家個市場，聯儲局未來一兩年都會維持超低利率政策，呢個政策正好孕育住許多新嘅投資計劃，其中利用低息貸款去賺取較高利息的回報，已經成為無本生利嘅工具；就等於對沖基金，利用沽空低息貨幣，購買高回報產品，從而進行一個「套息」的行為。

從向銀行貸款嚟講，又真係唔可以亂借，因為唔係樣樣都咁着數；不過，大家每年都要交稅㗎啦，係咪？正好稅務貸款就成為一種較安全同低成本嘅貸款。依家樓市交投咁靜，銀行資金要搵出路，稅貸自然就成為其中一個目標啦！

今年稅貸市場比以往都熱鬧，提供嘅優惠都幾多，咁多間銀行都搶客咁款，用特低稅務貸款搶市場。大家格過價之後，揀到合心水嘅 Plan就可以出擊。

最好十二個月還清

貸款額方面，一般都借到月薪嘅六至八倍，或者稅款嘅一至三倍，還款期有時可以延長到四十八個月，不過筆者就建議大家盡量借十二個月就算嘞，以免帶條數去另一稅期啦，係咪？通常稅貸嘅利息都非常低，實際年利率唔會超過5%，喺依家咁低息嘅環境，加上高通脹底下，大家當然借得就借啦！

咁借咗錢之後要點做？要留意嘅係，我哋每個月都要繳交定額還款嘅，所以真係好難做一次性投資。不過計掂數之後，如果每個月還款額又唔係太肉痛，人工都仲頂得住，咁又可以諗吓點樣善用呢筆借番嚟嘅「未來錢」。依家出面環境咁惡劣，借番嚟嘅錢又唔算係閒錢，當然唔適合投資高風險玩意啦。比較令人放心，又可以比銀行還款利率高嘅產品，仲要低風險時，我諗到嘅就只有債券喇！不過日常大家投資債券又驚間公司執，所以買債券都要揀可以分散到投資風險嘅，你話係咪？

目標回報率至少10%

用2至5% 息口借咗稅貸，目標回報率當然要有10%左右啦；依家市況，如果自己買債券，一來香港債券市場唔係好發達，二來買單一債券犯本之餘，喺咁嘅市況入面都唔知間嘢會唔會執，係咪？所以最好就係分散風險喇！大家不妨諗諗用高收益債券基金嚟分散風險，一來呢堆基金嘅經理真係要考察間公司會唔會執，二來佢一大堆債券買咗番嚟可以幫大家分散咗個風險，三來回報有番咁上下。

其他嘅債券類型仲包括，政府票據/債券、公司債券、公司商業票據、可換股債券、零售存款證等等。債券並唔係完全保證100%保本嘅產品，大家千祈唔好誤會。如果大家打算自己單獨出擊，個別購買債券，就要考慮（1）間公司會唔會執，如果唔執，大家都可以拎番本金同利息；（2）大家買債券時有冇折扣，好多債券喺二手市場時會以折扣價放售。一於鎖定目標，繼續追蹤、出發！