短炒倉：中國地板 實力唔曳

呢一輪市況淡靜，但亦有個別潛水半新股跑出，好似志強個多星期前介紹過嘅雙樺（01241），當時股價0.78元，上周五收1.4元，升近八成，收復招股價1.16元有餘。近期新股十之八九潛水收場，但上市初期乏人問津，亦有利盡快貨源歸邊，一旦回升，走勢可以相當凌厲。

中國地板（02083）今年五月上市，招股價2.95元，上月最低見過1.07元，潛水逾六成，但踏入十月開始回升，上周五收報1.86元，較低位高出七成三，但就仍跟水面有36%的距離。當然，能否重返水面，還要看股份本身實力。顧名思義，中國地板為內地木地板品牌龍頭，睇番集團上市後首份中期業績，盈利9,524萬元（人民幣．下同），按年增長46.5%，不但較招股書預期嘅8,100萬元超標完成，毛利率亦增長3.1個百分點，達33.7%，表現比一啲一上市即走樣嘅公司好得多。

雖然集團業務難免受內地樓市調控政策的影響，但作為建材類股份，同樣可受惠於保障房政策，按其業績，之前股價表現實在有被過分睇低之嫌，就算短期返唔到招股價，亦可博其上試之前於2.3元左右的橫行區阻力，支持位就睇1.6元。

中國地板（02083）

阻力位：2.3元

支持位：1.6元