股海實戰：太陽能股非撈底時候

歐債問題威脅全球金融市場穩定，各國都心知肚明，歐盟已將定出具體解決方案死線延至本周三嘅會議，此前無論係大戶或小戶都傾向駐足觀望，故見上周五港股成交僅450億元，扣除衍生工具交投，大市實際成交可能得200億元，好難想像港股成交額可以回落至咁低嘅水平，亦反映金魚缸缺水嘅情況愈來愈嚴重。

從恒指周線圖可見，十月首周陽燭倒轉錘頭，次周再現陽燭，但10日線18,960點前遇阻，本周轉陰燭收市，若呢浪確認上唔番10日線，後市再掉頭試本月低位（16,170點）嘅可能性增加。阿莊未有改變睇法，即今浪調整重要支持喺16,000點水平，一旦跌穿，恒指十年月線圖顯示，向下望空，要到12,000點水平先至有重大支持，各位要自求多福！

C組券商吊鹽水

上周五牛熊證及窩輪佔大市成交比例逾四成，持續企喺高水平，但阿莊所見，其實散戶大部分早已離場，剩下來嘅主要係大戶們對撼。專門做散戶生意嘅C組券商，已經處於吊鹽水狀態；至於大行，投行部門亦唔好過，IPO市場不振，企業融資部門今年幾乎交白卷唔使多講，至於個人理財部門，由於唔少「尊貴客戶」嘅股票組合市值大縮水，理財顧問因客戶組合市值未達理財計劃下限要求，而備受客戶同公司嘅壓力，聽講呢排都有唔少投行中人要去見心理醫生，唔排除未來三至六個月，金融行業嘅失業率會明顯上升。

寒冬未至，但金融圈寒風已滲入骨。事實上，今年確實出咗唔少「輸死人」嘅股票，基金散戶都要輸鑊甘！好似「中投三寶」（保利協鑫（03800）、中芯（00981）及旭光（00067））可謂最經典，股價由五十二周高位回落幅度達到六至七成之巨！

講到保利協鑫，近期全球光伏業風聲鶴唳，不斷聽聞內地有中型以上光伏企業財困嘅消息，主要係近年產能過度擴張，加上近三個月全球多晶硅等光伏產品價格大插水，上下游庫存高企，故不得不爭相割價促銷，惡性循環之下，整個行業正面臨一次大規模嘅洗牌潮。上周五，專門做太陽能晶片嘅卡姆丹克（00712）公布第三季度純利同比大跌逾九成，拖累股價跌近9%。阿莊相信，圍繞光伏產業嘅利淡消息尚未出盡，故現時亦尚未到抄底相關股份嘅時候，任何反彈只宜視作減磅逃生嘅機會﹗