數據中心短缺跨企頭痕

市場對數據中心嘅需求愈來愈大，早排政府喺施政報告首次提出預留土地做數據中心。事實上，企業都積極在各地搵適合做數據中心嘅地皮，一份最新全球數據中心設立地點風險評估報告顯示，香港係亞洲區首要選址地點；但香港可以發展數據中心嘅地皮根本唔夠，如果政府再唔撥多啲地，呢個優勢隨時會畀新加坡等地區取代。

高緯環球聯同工程顧問Hurleypalmerflatt喺全球20個國家或地區，就能源成本、企業稅率、國際網速等11個風險因素作評估，香港喺全球排名第4位，而喺亞太區更加排第1，即風險喺亞太區中最低。

改裝樓宇未必達要求

高緯環球香港執行總監蕭亮輝同劉Sir講，數據中心發展有好多限制，例如要有大量公共空間配合後備發電機、供電變壓等設備的組裝需要，普通樓宇唔易達到改裝要求，但新落成工廈及貨倉數量近乎零，搞到呢類物業供應緊張，佢話近期有跨國公司喺香港搵緊2至3萬呎樓面發展數據中心，都仲未搵到。

落成需數年 遠水難救

雖然最新嘅施政報告提到，會撥2公頃將軍澳土地發展數據中心，但具體細節要喺二○一三年先公布，佢認為直至物業落成都要好幾年時間，政府有必要增撥更多土地發展數據中心，如果唔係香港喺亞太區嘅領先優勢好易會畀其他地區趕上。

香港近年得到唔少本地及外地大企業垂青，買地自建數據中心，好似谷歌喺本港買入2.7公頃地皮發展數據中心，投資額逾7.8億元。消息話，谷歌買入嘅地皮喺將軍澳工業邨；另外，港交所亦喺同區投資15億元發展數據中心，預計可在明年第四季入伙。而滙豐銀行就更早，喺舊年用咗8.16億元投到政府推出嘅沙田石門地皮，發展數據中心同後勤中心，足見市場需求幾大。