Fundman睇市：恒大地產跟進贏面高

歐洲大陸拯救「歐豬」債危機的新聞，真係日日新鮮鑊鑊甘，那邊廂，斯洛伐克否決擴大EFSF措施（但市場估計月底前仍會順利通過），標普及惠譽又調低西班牙十間銀行信評展望，不過美股一於少理，道指微跌，納指升17點，報2,583點，是三個半星期收市高位，完全無視歐洲救援受阻的消息，可見根本不把歐洲大陸放在眼裏。反而亞洲股市卻係先天下之憂而憂，未出事驚定先，搞到港股今年成為全球最差表現股市包尾頭三位。

到底美歐亞三地的大孖沙，邊個太樂觀？邊個睇得太淡？很難搵到標準答案，正所謂物極必反，唔夠兩個月恒指先後跌穿兩萬一、兩萬、萬九、萬八甚至萬七關口，在遠遠弱過外圍股市底下，出現挾淡倉情況是自然不過，但筆者唔想亦唔敢估到底今次港股可彈幾高，不過由沽空佔成交比例又再回升，由前日的8.5%回升到9.6%的偏高水平，看來淡友準備誓死頑抗，由死唔認輸的情況估計，空倉回補推動的升勢，仲未結束。

平保跌得多彈得勁

恒指尋日升187點，收報18,329點，期指由前日低水146點，掉轉頭炒高水116點，收18,445點，即市炒家錯邊站，輸高低水都隨時輸死人。跌得多彈得高，建行（00939）、友邦（01299）及平保（02318）三隻淡友愛股，貢獻恒指升幅的四成，瑞銀估計未來十八個月平保都唔會有集資壓力，以新保單增長12至15%計，現股價只係一二年度1.3倍企業價值（EV），比○八年海嘯時仲平，按目標係上升到1.97倍，或者新保單價值15倍水平，目標價睇72.36元，比平保昨日收市價50.2元，高44%。

中央要壓樓價，地方政府收入卻依賴出售土地收入，樓市一直悶落去，後者難保唔會有彈盡糧絕嘅一天（貴州最近開徵煤價調節稅，就盛傳係同地方政府水緊有關），佛山偷雞有條件放寬限購令，殊不知一日之內就話暫緩實施，可以見到中央與地方政府壓抑樓市取向，在利益考慮上是貌合神離，壓抑樓市手段放寬的預期雖暫時落空，但佛山事件後，股市還是比較信「上有政策下有對策」這金句，內房股普遍反彈，最勁要數恒大（03333）升10.2%、保利香港（00119）升9.1%，潤地（01109）升6.5%，遠洋地產（03377）升6.3%。

壞消息唔跌，恒大股價強勢引起筆者興趣，尤其昨早上財政部通告，話恒大財務報表有問題，公司急急澄清，指純粹是○九年報表內廣州恒大及子公司報表合併前的往事，股價亦由即市低位2.43元抽升至2.91元，單日低位反彈近兩成。

恒大是內地土儲最豐厚的地產商，財務與售樓收入對資產負債的敏感度相對較高，成為大孖沙睇好睇淡的對撼工具，七月高位6.27元，去到上星期低位2.13元，股價幾乎得番三分之一，認真誇張，股價去到咁低殘，睇估值無咩意思。由沽空紀錄，去到九月下旬開始，沽空恒大情況明顯收斂，九月廿三日至今，沽空比例一直停留在單位數，僅得本周一高於一成，見10.9%，較七八月為少，由此推斷，恒大反彈去到沽空密集區底部3.3元左右，難度應該唔大。