股海實戰：中國南車不宜再做淡

尋日市場消息多籮籮，恒指表現比想像中強，先跌後回升，收報18,329點，升187點，成交769億元，沽空比率略為回升至9.6%。期指高水115點收市，似乎大戶會繼續挾高指數，短線升抵18,500至18,600點有阻力，但最好情況可見19,100點水平。至於上周低位16,170點係咪底，阿莊仍不敢妄下判語。

尋日A股及港股券商股均有好表現，主要係市場盛傳中國證監會將批准跨境ETF，見中信証券（06030）好不容易重上水面，申銀（00218）、第一上海（00227）、光控（00165）升幅介乎7至11%。老實講，除非短期內真係有利好政策消息出現，否則以未來六個月嘅經濟展望，股市表現難樂觀，券商股似乎欠缺炒上嘅理據。

復建居屋無損樓市

特區政府施政報告出爐，主要內容已事先張揚，且復建居屋數目有限，又要數年後才可供應市場，故對樓市實際影響輕微，地產股尋日普遍上升，但表現唔及幾隻地產代理股犀利，田生（00183）急升21%、美聯（01200）及美聯工商舖（00459）分別升7.6%及12.5%。

阿莊喺5元邊沽最後一批中國南車（01766），勢估唔到本月初低位見過2.38元，真係一額汗！自溫州動車相撞事件後，內地正檢討高鐵發展，實際運行和長遠發展雙「減速」係必然嘅結果，畢竟國家不能以犧牲乘客安全來換取高鐵發展世界第一之譽！事故之後，鐵路業陰霾難消，舉債能力亦大打折扣，南車原定嘅A股增發計劃，規模亦因此而由原定嘅110億元人仔縮減至90億元人仔。但相信呢幾個月股價跌勢已頗大程度反映產業政策風險。

近日見到鐵道部發行今年第一期兩百億元人仔中國鐵路建設債券，並宣布鐵路建設債券利息收入減半徵收所得稅，顯見中央仍力挺鐵路建設，相信此舉有助產業撥開雲霧，讓整個產業重新踏上征途。

最近南車股價連現兩支陽燭，昨日急升逾14%，收報3.44元，成交增至1.97億元，事緣有消息指，其母公司將獲得注入20億元人民幣，市場憧憬南車亦可受惠。似乎，圍繞鐵路股嘅利淡氣氛已開始淡化，南車月線圖連現五支大陰燭後，本月應有望轉以陽燭報收。喺了解公司定單情況前，阿莊唔敢講隻股可以彈到咩位，只係股價既已回落至○八年嘅起步價，亦難以想像中國鐵路業未來會開倒車，故再做淡並唔划算。