魚缸Blogger：遠東宏信動力增強
斯洛伐克首輪投票意外否決擴大EFSF機制，但並無令環球股市出現震盪，而中央或推出跨境ETF嘅消息，就帶動恒指尋日奪回20日線，喺好淡消息紛陳之下，惟有睇住萬八關支持操作。
雖然近日「溫州走佬潮」令市場憂慮內地民間借貸市場爆煲，但幾隻放數股收入水漲船高是不爭事實。行業龍頭遠東宏信（03360），繼五月發12.5億元人債後，近月再取得7.5億元人仔嘅銀團貸款以擴充業務，加上溫總力撐民間借貸市場，規模更大、母公司為中化集團嘅遠東宏信，自然更值得睇好。
遠東宏信尋日抽穿保力加通道中軸後，向上動力增強，料主要阻力喺6蚊，支持5.3元。
遠東宏信（03360）
阻力位：6.0元
支持位：5.3元