短炒倉：雙樺 走勢明顯轉強

匯金入市消息繼續熱炒，唔單止四大行，連招行（03968）同民行（01988）等都勁升，但偏偏A股銀行股反應唔大。講到底，都係因為一眾內銀H股累積咗大量空倉，大戶趁消息食胡及減磅，故出現H大升A唔多升嘅情況。

經過一輪跌勢後，近日一眾半新股都跟隨大市做好，六月底上市嘅雙樺（01241），尋日大升13%，走勢明顯轉強，有留意價值。

雙樺為內地汽車供暖、通風及製冷系統部件供應商，產品主要供應內地OEM市場及國外維修業務。雖然內地車市在中央補貼政策完結及限車令等不利因素影響下持續低迷，即使在剛過去的黃金周，銷情仍未見起色，但經過去幾年新車銷售急增後，車輛數目大增，據內地汽車流通協會統計，未來五年內地二手車市場將以每年28%的速度增長，這對於上市時以內地汽車維修市場概念作招徠嘅雙樺，自然係利好因素。

雙樺招股價1.16元，上星期跌至低位0.51元後開始回升，昨日收報0.78元，並一舉突破20日線，相信已成功尋底，可博其進一步回升。

雙樺（01241）

阻力位：0.93元

支持位：0.73元