股海實戰：恒鼎毋須睇淡

國家隊入市消息，帶動四行A、H股股價齊齊高開，其中以農行（01288）表現最標青，升12%。港股亦順勢升穿萬八點關，高位見18,456點，收報18,141點，升430點，成交837億元。

八月以來，農行備受「空軍」摧殘，即使高層開腔話至少明年底前不須要增發股份集資，暗示「空軍」唔好諗有平貨補倉，亦未能扭轉弱勢，搞到要上大人出手。之不過，見尋日農行沽空額仍有2.85億元，目前尚難評估「空軍」是否就此收手。呢啲大撼大場面，都係做觀眾最實際！

資金續流出防守股

講到沽空，尋日電能（00006）沽空額達到1.33億元，沽空比率達44.6%，印證阿莊上周五話，有資金流出低BETA值嘅防守股。事實上，恒指由上周二低位16,170點，升至昨日高位，足足升咗2,285點，反彈力度不弱，加上中央出手「維穩」，有地方政府開始放寬限購令，歐債危機亦暫告紓緩，部分長錢開始流出防守性股份唔出奇，但去向如何則尚待觀察。

尋日內地A股午後升幅顯著收窄，其中一個原因係煤炭股下跌。事緣國務院本周初發布修改資源稅暫行條例決定，油氣資源稅及焦煤資源稅稅率均較試點時有大幅提升。新修訂將於十一月開始實行，此前煤炭股或尚有震盪，但別忘記入冬係煤炭需求旺季，相信煤價易升難跌，對煤炭股中期展望毋須過分悲觀。

講開煤炭股，恒鼎實業（01393）剛宣布截至九月底止第三季度經營數字，季內精煤銷售量44.3萬噸，平均每噸售價1,344元人仔，二者按年同升21%；焦炭銷量4萬噸，按年減55%，但平均每噸售價1,737元，按年升32%，難怪尋日資源稅消息一出，即使A股煤炭股發軟蹄，但恒鼎股價仍升半成，收報2.65元。

睇番恒鼎股價由四月底高位8.1元，一直落到本月初低位1.83元，累跌多達77%，今次季度數據對辦，料有助股價回穩，未來當視乎煤價走勢及公司產銷量恢復進度，短期支持位在2.35元，阻力位在3.12元。