港島超豪宅提早入冬

政府去年底連番推出壓抑樓市措施，好似收緊豪宅按揭成數至五成，又增加豪宅額外印花稅等，加上唔少豪宅業主唔願意劈價出貨，搞到一向係好多換樓客終極目標嘅山頂、南區，第三季交投暴跌，期內的買賣成交當中，內地買家只佔一成。

劉Sir最近睇到一個地產代理嘅報告，原來上季喺山頂同埋南區只係得19宗買賣成交，比起第二季足足少咗82%，成交總值更加由第二季嘅101億元，大幅縮水89%至約11.6億元。

兩區逾億元買賣僅3宗

由統計數字睇到，第三季上述兩區錄到嘅買賣成交中，分層戶佔13宗，洋房佔5宗，而屋地只得1宗，由於成交疏落，所以上一季逾億元嘅成交都只得3宗，最高價係山頂盧吉道28號屋地，成交價高達1.96億元，而季內唯一進身億元嘅分層戶，係南區福慧大廈一個面積2,857方呎單位，成交價1億元，呎價超過3.5萬元，亦係期內呎價最高個案。

「大款」佔10%遜九龍站

至於上季的買賣客源方面，內地買家佔比例只得約一成，明顯較九龍站屋苑及港島南貝沙灣為少，而本地嘅買家與海外等買家就分別佔約七成同兩成；至於整體市場用家與投資者比例，約莫分佔八成同兩成。

第三季山頂、南區買賣交投表現麻麻，但租務市道就相算平穩，代理數據又顯示，兩區上季有161宗豪宅租務成交，比較對上一季嘅171宗微跌約6%，當中分層戶佔133宗，洋房租務就有21宗；而逾20萬元大額成交則有10宗，佔宗數比例6.3%。

用家觀望 呎租升逾8%

由於近幾個月買家入市態度觀望，寧願暫時轉租，刺激租金回升，該兩區第三季呎租按年上升超過8%，依家平均呎價45.4元；而10個主要豪宅中，有6個上季租金升0.3至11%，升幅較大嘅係淺水灣道37號，期內平均呎租升到31.9元。