股海實戰：內房股追貨風險高

港股上周來個「V」形反彈，恒指周內一度下跌1,422點，由低位反彈至上周五高位，最多升1,630點，即係話四個交易日上落足足有3,000點波幅，真係驚濤駭浪！

歐洲央行同英倫銀行加大向市場泵水嘅力度，足顯誠意，但重病加大止痛藥分量頂多可以暫時紓緩痛楚，並未有解決問題。從基本面睇，歐債情況依然令人擔憂。至於美國，總統奧巴馬表明，希望國會月內表決就業法案，而近期反華爾街示威活動升溫，已成為逼共和黨就範嘅籌碼，且看今次鬧劇如何收科！

減少借貨空軍收斂

上周阿莊沽出電能（00006）同煤氣（00003）後，其股價均告回落，而中移（00941）上周五更逆市跌3.4%，似乎有資金流出低BETA值嘅防守性股份。再睇上周五港股沽空情況終於有所收斂，沽空額81.6億元，沽空比率降至9.8%。聽聞由於市場對規管沽空活動反對聲音日高，部分大行亦識做，自動減少借貨供應，「空軍」借唔到貨，自然亦冇得發圍！

之不過，目前話港股經已見底，為時尚早，一來外圍變化快，且不明朗因素仍多；二來金魚缸升跌最終取決於市場流動性，內地宏調未完，市場流動性持續緊張，難保年關前又因為呢個問題再成淡友發動攻勢嘅藉口。故暫時只能以反彈市視之，且特別係要提防重演八月份恒指由18,868點抽高至九月初高位20,975點後，大戶落閘放狗大肆屠牛嘅場面！

「十．一」黃金周眨吓眼又完結，A股今日復市，由於外圍回穩，加上黃金周期間領導人親訪溫州派定心丸，相信今日A股復市表現唔會太過難睇。展望本周，周四內地將公布企業景氣狀況季度報告，周五將宣布最新月度CPI數據，且觀望數據表現，以評估內地經濟最新情況。

上周內房股作絕地反擊，上周五雅居樂（03383）升13%、碧桂園（02007）升近一成。中國海外（00688）抽高至13.14元回落，收報12.68元，升4%，公司將於本月十八日宣布第三季度業績。究竟龍頭內房嘅最新季度銷售數字表現如何，對評估下半年以至全年業績影響甚大。阿莊建議此前不宜輕率沾手內房股，畢竟調控政策未見放鬆，且不能排除年底前會有中型內房企業「出事」，落場追漲風險甚高。