魚缸Blogger：中建材向阻力位進發
港股上周四、五累升近1,500點兼收復失落近一個月嘅10日線，走勢上可算係暫時喘穩，加上歐央行終於行動買債，就算惠譽同穆迪再降歐豬國家評級，大市今早低開後應好快搵到支持。
港股氣氛稍為好轉，亦係搵好股博反彈之時，中國建材（03323）今年八月高見17.58元後，喺唔夠兩個月內累跌近68%，跌幅相當驚人。然而，即使內地地方債務融資現危機、基建需求減少，但喺溫總力撐今年建一千萬套保障房、建材下鄉試點增加，而同業亞洲水泥（00743）又發盈喜等利好因素下，市盈率唔夠十倍嘅中建材更顯吸引力，上周五股價再爆升逾17%，朝不對稱雙底頸線阻力進發，阻力位喺7.9元，支持位7元。
中國建材（03323）
阻力位：7.9元
支持位：7.0元