樓市出更：捱價捱息難為新業主

近排樓市交投係靜咗唔少，但係樓價仍然企穩，睇番今年首三季，樓價就足足升咗約莫一成，加埋銀行已經喺今年三月起，多次調升樓宇按揭息口，九月份新做按揭嘅業主嘅供樓負擔比年初大咗唔少。劉Sir搵咗5個指標二手屋苑部分同類成交單位，比較佢哋年初同依家嘅每月供款，粗略睇到市區樓嘅藍田滙景花園同鰂魚涌太古城供款增幅較大，比年初足足升咗兩成幾到近三成。

早排樓價係咁升，但息口持續超低，買樓仍然係最穩陣嘅投資，不過，銀行成本上漲等因素，加息係無得避，好似今年銀行已經加咗5次按息，最新滙豐銀行同業拆息按揭（H）息口，已去到H加2.3至2.7厘，較年初加息前，息口高咗1.66至2.06厘。

滙景樓價年內升13%

代理老友同劉Sir講，滙景花園以面積約785方呎戶交投量最多，近日錄到嘅13座中層B室成交，做價516萬元，而二月份同類型單位，以466萬元轉售。根據市場一份最新樓價數據，滙景花園今年樓價已升超過13%。

以滙豐按息H加2.3厘計，實際按息為2.51厘，每月供款約16,420元；而今年二月中同類單位月供只係約莫12,672元，同現時相差29.6%。

至於港島太古城，年初到依家樓價升咗12%；其中安盛台寧安閣高層A室，最近以640萬元成交，每月供款額20,366元，較年初同類單位每月供款高21.8%。而上車門檻較低嘅新界樓，部分單位樓價較年初下跌，但供款金額仍然向上，天水圍嘉湖山莊景湖居7座一個中層單位，成交價216萬元，較年初同類單位低4萬元，但每月供款要6,873元，較之前高近15%。但市場估計樓價不會再攀升，相信供樓負擔會趨穩定。