股海實戰：農行未到買貨時候

港股挾淡倉，恒指一下子抽高逾九百點，收報17,172點，成交840億元。之不過，大市沽空未因反彈而減少，全日沽空額94.9億元，沽空比率仍達11%，可見「空軍」全無收兵之意！港交所（00388）居沽空榜首位，沽空比率39%，呢啲位「空軍」先至落重藥，都係避之則吉。

正所謂有咁耐風流，過去幾年內地經濟快速增長，以民企之都著稱嘅浙江溫州，憑着中小企快速成長，加上房價大漲，製造了不少富戶，誰知今年卻交上黑運，先係七月動車相撞，舉國震驚；如今又醞釀民間借貸爆煲，傳聞當地民間借貸年利率最高達到500厘，搞到人心惶惶。結果十．一黃金周未完，國務院總理溫家寶就要動身赴溫州主持大局，明確指出要提高對小企業不良貸款比率嘅容忍度，並督促各類銀行切實執行國家支持中小企業嘅信貸政策。

內銀空軍有恃無恐

本來，若中小企經營不善，被淘汰係在所難免，但呢半年溫州民間借貸市場熾熱，可能唔少企業見正常生意利錢唔高，樓又冇得炒，故將樓房或廠房抵押予銀行套現放高利貸，一旦被人走數，最終難免會對銀行體系構成影響，亦影響其他中小企嘅正常信貸活動。

講到要提高對小微企業不良貸款嘅容忍度，內銀股東未必聽得入耳，事關咁講法意味銀行要承擔較高嘅風險。阿莊相信，「空軍」亦正好睇準年關將至，中小企周轉問題會惡化，內房產業又隨時會傳來倒閉潮，內銀股股價易跌難升，故放心繼續做空！

平心而論，溫州只係中國其中一個小地方，當地民間借貸活動亦未有確實嘅數據統計，對整體內銀不良貸款所構成嘅影響係有，但實際上未必如想像般多。只係依家全球股市動盪，利淡消息容易被放大。第三及第四季A股企業盈利表現，也許有助更準備掌握實際情況。

講開內銀，農行（01288）股價自八月初高位4.3元回落至本周二低位2.28元，累跌達47%，跌勢超乎想像。近日有消息引述農行高層指，至少一二年底前，該行都不會透過增發股份籌資，似乎係要告訴「空軍」，別期望可以攞平貨補空倉。究竟農行股價見底未，阿莊都冇水晶球，只係憑經驗判斷，經過呢次大跌，股價需要喺低位徘徊一段時間，打造圓底始能再謀上攻。既然如今連底嘅雛形都未見，自然尚未到買貨時機吧。