租盤照劈北區重災

樓市陷入冰河時期，好多一心諗住交吉沽貨嘅業主，面對逆市惟有變陣轉為放租，一時間，市場租盤急增，好似北角城市花園全海景樓王咁，減租兩成都無人吼；新界北區粉嶺綠悠軒及花都廣場均有單位低市價近一成先租到出去。

亞洲地產姚雲龍同劉Sir講，北角區屋苑近排買賣成交大減，好多業主寧願將單位放租，搞到租盤大增，租金自然向下；好似城市花園面積約720方呎嘅兩房單邊全海景樓王，上年有客畀到2.2萬至2.3萬元都搵唔到盤，但係依家部分該類單位月租減到1.8萬至1.9萬蚊都無客，減幅至少15.7%。

啟豐園低市值11%租出

新界區屋苑租金亦出現顯著下調，屯門啟豐園3座一個低層約467方呎單位，剛以約5,500元租出，較上月同類市值月租低逾11%。

美聯黃嘉明稱，粉嶺花都廣場以低市價租出1座高層G室，面積706方呎，月租8,800元，較市場一般租到9,500蚊低約7.4%。佢同劉Sir講，依家租盤比起暑假嗰陣多咗起碼三、四成，事關唔少業主一心諗住交吉賣個好價，奈何市況調整，惟有將單位放租再作打算。

租盤增四成 綠悠平9%

同區綠悠軒亦有2宗平租個案，中原陳國輝話，1座中層A室兩房單邊戶享開揚景，面積619方呎，連基本家電以7,500蚊租出，較業主原開價月租8,300元，低咗9.6%；另外3座高層H室望內園戶，同樣係619方呎兩房戶，無裝修無電器月租7,300蚊，比市值租金8,000蚊亦平近9%。

東九龍譽．港灣6座高層G室三房望獅子山景單位以1.5萬蚊租出，呎租22.1元，比同類單位低5%。另峻弦2座中層E室以1.9萬元租畀專業人士，呎租18.6蚊，亦低市價5%。但亦有理想租金成交，粉嶺名都1座低層B室月租8,400元，高市價7.7%。