短炒倉：數碼通 有條件續彈

雖然iPhone 5嘅盼望落空，但有加強版嘅iPhone 4S止住癮，過幾日仲有IOS5升級，一眾蘋果信徒總算唔會冇晒寄託。

蘋果股價周二晚雖一度跌逾3%，但一如佢嘅產品，無論剛推出時有幾多批評，但結果還是會大賣一樣，蘋果股價尾市跌幅顯著收窄至只有0.5%。至於對電訊營運商嚟講，唔理iPhone 5定係iPhone 6，總之只要有新iPhone就代表有生意，難怪數碼通（00315）同和電（00215）周二齊齊偷步做好，逆市升逾5%。

作為今年的強勢股，數碼通股價的調整遲至九月中至出現，但跌勢就相當急勁，由五十二周高位18.5元回到周二低位9.8元，只係用咗兩個多星期時間，但跌幅就達到47%，短線超賣相當嚴重，故出現反彈亦屬正路。

睇番集團截至六月底止年度純利大增1.6倍，至7.54億元，每股盈利0.73元，以現價10.78元計，往績市盈率14.7倍，按其業務的高增長性質，估值仍屬相當吸引。

不過，更值得一提的是集團派息比率達百分百，全年每股派0.73元，息率達6.7厘，在當前市況中，對股價的支持不言而喻，就算真係不幸坐艇，守起上嚟亦都有安全感得多。若大市短線出現技術反彈，相信數碼通有條件回升至12.5元水平，支持位9.8元。

數碼通（00315）

阻力位：12.5元

支持位：9.8元