Fundman睇市：國美2元樓下博得過

外圍消息草木皆兵，港股愈跌愈急，假期前，恒指再插571點，收報16,250點，連跌四日合共唔見1,880點，空軍完全沒有放軟手腳迹象，沽空成交95.7億元，佔大市成交比例12.7%，係連續第五日沽空比例高於一成。

由於八、九月實在輸得太甘，近期唔少對沖基金即使明知咁遲至加入空軍風險唔細，但仍決定孤注一擲賭跌，期望一旦押中，可以幫補過去兩個月損失，但積極的借貨沽空，已令唔少人關注，七個證券業組織促請政府及監管機構，加強與沽空活動相關的監察工作，到底港股會唔會對沽空交易設下更多限制？其實，限制沽空，筆者認為只係斬腳趾避沙蟲，況且沽空有辣有唔辣，一旦大市出現終極一跌後，來個淡倉回補潮，升勢亦會比無沽空活動下來得強勁。

大型藍籌全面失守

只係十多日時間，恒指跌穿萬七，連萬六都嚟緊頭，相信唔少人會問，到底大市幾時至見底？末日博士話見萬二，換句話說，只係比美國次按海嘯後的港股低位高一成左右，以今日藍籌資產及盈利規模，較像是語不驚人的粗糙預測多啲啲。九月中筆者曾指出，以過去二十年港股的兩次重要低位，九八年八月及○八年十月，市盈率可以去到7.3及7.7倍，換句話說，如果上市公司業績唔會大幅偏離分析員預期，恒指可能回落至15,736至16,598點之間任何一點，估唔到，眨吓眼已經去到目標範圍。

到底跌夠未？走勢派信徒認為，牛市調整唔應該多過整期升浪的0.618，海嘯後恒指由低位10,676點升至一○年高位24,988點，合共14,312點，0.618調整支持在16,143點，星期二恒指最低見16,170點，只差27點跌穿「死線」，間尺派同牛市信徒，可能抹一額汗！但不妨睇番幾隻主要藍籌，滙控（00005）的0.618回吐支持在56.416元，周二低位是56.35元，穿少少；建行（00939）在4.638元，周二低見4.41元，一樣穿咗；地產龍頭新地（00016）及港交所（00388）分別在86.189元及106.58元，周二不約而同穿埋，最低見85.45元及100.5元，作為香港經濟縮影的藍籌中，銀行、地產及證券業都有穿位迹象，假如幾日內無明顯反彈，再硬頸的好友，都要接受現實。

思捷（00330）業績唔好，是經營上出問題，雨潤（01068）盈警亦然，但勢估唔到，今日中央收水、溫州走佬潮、兼且三、四線樓市有燶味傳出的當下，有公司笨到選在這時進軍內地房地產，筆者說的是國美電器（00493），單在過去四個交易日，國美股價急跌三成半，因一項投資額2億元人民幣的計劃，令市值蒸發156億元，結果迫使管理層急急出來認錯兼嗌停。

留意到國美一四年到期的可換股債券（CB），一樣跌得誇張，孳息抽升至8.8厘，由於跌穿行使價2.45元，正股被拋售對沖CB，加速正股股價跌勢，若然公司唔係執笠，似乎CB比一一年預測市盈率9倍左右的股價更值博。依家市場鍾意鬥淡，國美海嘯時股價曾低至1元樓下，現時已經有人話今次會再戰低位，但睇番過去三年來，業績幾乎由低位翻了一番，筆者不太相信會再有海嘯價出現，況且目前估值只及競爭對手蘇寧（A股002024）六成二左右，既然管理層認錯，不妨諗吓2元樓下博反彈。