股海實戰：招金睇唔通無謂博

全球股市低處未算低、港人身家大縮水，最慘呢回連大靠山祖國都水浸眼眉，難怪近期無論喺金魚缸抑或街頭巷尾，都充斥着負面情緒，不過暴風仲未來臨經已哭喪咁款，係咪太過杞人憂天？抑或暴風真係到來時，屆時災情又會有幾恐怖？惟有用平常心看待無常，日子可能會好過一點！

回說周二恒指低收逾500點，唔少藍籌股陸續失守技術關鍵位，阿莊上周初話等港交所（00388）見「紅底價」先至再睇，點知話咁快就見到，周二該股一度低見100.5元，若然跌穿「紅底價」呢個心理關口，下一支持位恐怕要落到90至92元。

大笨象無還擊之力

此外，上周阿莊話場外滙控（00005）ELN接貨價落到47元，睇見歐洲啲銀行股咁差，大笨象真係算跌得少，再睇近期股價跌穿60元關後毫無還擊之力，都係打定輸數！

周二大市成交753億元，沽空比率超過12%。面對空軍肆虐，有經紀團體向政府反映股票沽空透明度不足。不過，以歐洲為例，都有限制沽空措施，但一樣難阻股市下跌，皆因基本因素一直轉差，行政措施根本無法扭轉跌勢。依家希臘新一輪貸款又話要延遲，美國刺激經濟措施獲國會通過成疑，若然外圍情況真係再轉差，行政手段亦難力挽狂瀾！

可能大家會問，既然未來環球經濟前景咁唔明朗，可唔可以趁金價調整入市？阿莊對此有保留，皆因若然嚟緊真係大蕭條，相信唔單只匯市同股市，就連金市都難免出現災難，更何況現水平嘅金價仍然有唔少水分。唔睇好金價，唔使講亦唔會推介金礦股。好似隻招金礦業（01818），九月份股價由高位18.7元回落至9.94元，累跌四成多，係○六年上市以來最差嘅單月表現。若然金價真係轉邊，現時招金嘅預測盈利已不管用，難以掌握估值，亦無謂浪費鈔票去尋找答案！

講來講去，阿莊奉勸各位唔好再咁多心，一於將手持現金比例進一步提高，炒家就當自己要放長假環遊世界，暫時將隻鑊鏟放埋一邊！組合中，忍咗一日手，周二終按計劃悉售港鐵（00066）（均價23.2元）、煤氣（00003）（均價17.64元）同電能（00006）（均價62.2元），套現共160萬元。