樓市出更：居屋買賣嘯後最呆

全球股災波及樓市，有置業需要嘅基層用家都唔夠膽入市。地產代理研究資料顯示，上月全港只錄得31宗公屋二手買賣登記，創近二十個月低位；期內整體二手居屋買賣僅465宗，係金融海嘯後首次出現連續三個月唔夠500宗。

二手公、居屋單位由於涉及銀碼較細，始終有一批基層用家支持，但最近股市動盪不穩，連基層用家買樓市場都受影響，劉Sir參考數據，發現九月份全港公屋二手登記只係得31宗，不單連續跌三個月，兼創近二十個月新低，期內公屋二手買賣總成交金額亦按月減少14%至約4,083萬元，為近九個月新低。

公屋登記六季新低

資料仲顯示，上個月超過100萬元嘅公屋成交雖然都仲有25宗，不過其中價值最高馬鞍山耀安邨耀廉樓中層20室，成交價都只係188.9萬元，估計未來數月公屋登記量會繼續喺現時嘅低水平徘徊。另數據顯示，第三季二手公屋登記有111宗，係近六個季度新低，期內只得5宗短期轉讓登記個案，以觀塘翠屏北邨翠海樓中層22室賺幅最大，成交價125萬元，原業主持貨335天帳面賺約32%。

代理朋友同劉Sir講，九月份整體居屋登記量錄465宗，雖按月略升約2.4%，但已經係連續第三個月唔夠500宗，呢個情況金融海嘯後都未見過，對比舊年同期近1,000宗更少左超過一半，平均每宗成交金額約222.1萬元，較六月份高位減約1.5%。

至於居屋補價個案亦隨市況減少，劉氏稱，今年首八個月僅約1,398宗，較去年同期跌約27%，單計最新八月數據亦只126宗，連跌三個月並創近兩年半新低。