股海實戰：港交所考驗紅底價

港股上周接連失守萬九及萬八點關，全周唔見1,787點，收報17,668點，上周五成交達972億元，期指成交高達15.2萬張。雖然Q20財長會議發緊急通知，表明會採取所有需要行動以維持金融市場穩定，但齋用把口講難有作用。展望本周，又到第三季基金季結時間，喺粉飾窗櫥效應以及補倉盤帶動下，不排除短線港股有技術性反彈，但估計18,500至18,800點阻力甚大，阿莊維持睇淡未來兩個月股市走勢，會盡量忍手，等見萬六點水平再作打算。

空軍注碼愈玩愈大

究竟即將拖累恒指下探萬六點關嘅利淡消息會係咩？暫時睇嚟好可能係希臘違約、法國銀行受累要國有化、連帶歐洲銀行體系出問題。聽落好似好恐怖，但事實卻的確係朝呢個壞方向發展。上周四同周五，港股連續兩個交易日沽空金額都超過90億元，沽空比率超過一成，唔係有重大負面消息在後頭，班空軍點會愈玩愈大呢？

呢個月唔少散戶真係輸到入肉，愛股滙控（00005）跌穿60元，內銀股災情慘烈不用再多講。不過，呢次受傷嘅唔只係散戶，唔少傳統基金都輸得好甘，睇霸王（01338）、比亞迪（01211）、思捷（00330）、中國智能交通（01900）、金風科技（02208）、中國綠色（00904）、超大農業（00682）等基金股，股價都較五十二周高位打個「兩折」。金魚缸「Fall Sale」股票大賤賣，但亦唔等於價格已見底，皆因接下來第四季係傳統嘅「撲水」季節，人人都要現金過年關，最近同唔少廠商傾談，所知聖誕同新年出口定單慘淡，但願唔會見到嚟緊魚缸會有「一折」酬賓！

魚缸不景，港交所（00388）股價例跌，上周五見五十二周新低121.9元，收報124元。兩個月前講港交所見120元真係幾吸引；但兩個月後嘅今日就唔同講法，皆因大部分股票價格急挫，港股市值大縮水，即使明年中前指數跌定，相信股市交投都要靜得一年半載。目前港交所嘅估值（往績市盈率26倍）顯然尚未反映呢個大調整，估計未來會陸續有大行調低其盈利預測，建議等其股價考驗「紅底價」，先至再諗吧！