樓市出更：愉景灣長揸收租最穩陣

依家通脹高成咁，擺响銀行又無息收，打工仔真係要諗吓計，例如搵啲高回報又穩穩陣陣嘅物業作長線收租。劉Sir早排同代理朋友傾開，講起大嶼山愉景灣將有新樓推售，唔知買嚟收租回報好唔好，代理朋友就話現時愉景灣嘅租金回報率其實相當可觀，閒閒地都有4厘幾5厘，個別靚海景單位嘅回報可以去到6厘甚至更高，相信新盤回報都會唔錯，估計會有4厘。

中原李偉寧同劉Sir講，愉景灣一向租務交投活躍，因位處大白灣同二白灣沿海地段，好多單位都有優質海景，而且租客以公司客居多，例如有外資企業、投資銀行同金融保險業等高層人員租住，佢哋一般有唔錯嘅房屋津貼，所以租畀佢哋嘅租金一般都唔錯。

早前愉景灣觀海樓有個中層C單位，面積713方呎，兩房間隔外望優質海景，附設雅致裝修，成交價360萬，呎價5,049元，每月租金2萬元，租金回報達6.7厘，絕對係好吸引。

回報勝市區藍籌盤

愉景灣其實提供好多選擇，如洋房、低密度、同一般大廈式住宅；當中以洋房租金最理想，每方呎租金介乎40至50元，租金回報達5.5厘以上；低密度住宅呎租介乎30至32元，租金回報亦有4.5至5.5厘；至於大廈式分層單位，呎租介乎20至21元，租金回報4厘以上。

整個愉景灣共提供8,049伙，但大單位僅佔5%，整體放租盤大約有300個。李偉寧話，畀得起租嘅公司客普遍向大單位埋手，而即將推售嘅十四期津堤，主打千呎以上大單位，相信可以吸引唔少公司客戶垂青，估計租金回報可以穩企4厘以上。

另外，好多位處市區嘅二手盤，租金回報只喺約3厘水平；相比之下，愉景灣嘅租金回報算係好理想，因為部分租金回報高又穩健嘅藍籌屋苑，好似沙田第一城和新都城，都只係去到4厘水平。