短炒倉：維達 撈貨耐心等候

聯儲局唔玩QE玩OT，全球股市就跟住玩FF（Free Fall），恒指尋日跌逾900點，萬八關話穿就穿，身邊唔少股友都話，呢種時勢，最好就係關電腦關手機，斷絕一切股市資訊，仲想搵嘢炒？唔好玩啦！

不過筆者覺得，咁嘅心態又似乎消極過頭，畢竟今時今日恒指PE得八倍鬆啲，直逼九八年金融風暴時嘅水平，更遠差過「死人冧樓」嘅沙士時期的十三倍，就算外圍再差，試問港股仲可以跌幾多？當然，財力不足嘅就無謂勉強，但若然手上有未來一兩年都唔等使嘅閒錢，亦不妨留意吓有冇好股撈底嘅機會。

無論經濟好壞，基本生活必需品嘅需求都唔會減少，按照呢個思路，內地紙巾股恒安（01044）同維達（03331）係唔少人心目中嘅抗跌之選，但人同此心，形成在市好時股價居高不下，市淡時又畀人嫌貴的弔詭情況，惟有等大跌市出現，就係最佳入市時機。

留意到維達過去三日股價連續跳級落的同時，日線圖上都出現長尾錘的形態，可見有心買貨的人實在不少，但從反面角度，這往往亦是未跌完的象徵，以其現價市盈率仍有二十一倍計，有心撈底嘅建議可以繼續等候，至少睇吓8元大位守唔守得住再決定，阻力暫睇50日線8.9元水平。

維達國際（03331）

阻力位：8.9元

支持位：8.0元