Fundman睇市：聯通吸引力遜一籌

睇住期指今個月得兩日無出現開高走低，史提芬尋日仲估再嚟一次free falling的可能性比挾倉高得多，結果好嘅唔靈醜嘅靈，歐美股市前晚屍橫遍野，滙控（00005）編製的中國九月份PMI再跌到49.4，反映製造業繼續緊縮。缺乏好消息下，港股再跌912點，收報17,911點，四個交易日，恒指「極速」橫跨萬九、萬八關，且有愈跌愈快之勢。

恒指跌得轟烈，但沽空不跌反升，全日大市沽空96.23億，比前日多五成五，佔大市成交比例由9.45%升至11.6%。即市炒家不妨留意，八月跌市至今，幾次沽空額飆升超過90億元後的兩三天，大市都會出現短暫反彈，例如八月五至十一日三次超過90億，之後恒指由18,868反彈到20,504點共1,636點，之後係八月十九及二十二日，兩日沽空均逾90億，恒指之後由19,047點挾到20,975點，共1,928點。執筆時歐美股市續插，假如今日港股再低開，小心沽空倉威力，隨時令大市有強力死貓彈。

OT救經濟成效存疑

聯儲局一如預期推出Operation Twist，簡稱OT，透過賣出4,000億美元短債轉買長債，壓低長期息率。OT開宗明義，都係希望推低市場資金成本，主攻八年以上的債息，目的使企業能夠取用更長期的低融資成本，置業者嘅按揭利息都可以畀少啲，藉此刺激投資及消費。前晚發表聲明後，兩年期美國短債息率由0.15厘反彈上0.19厘，十年及三十年債則由1.93及3.2厘碌落1.85及2.99厘。

華爾街股市消息後反高潮，道指跌幅由公布前的30點擴大到283點收市，市場對新政策感到掃興，一來是QE1、QE2已經證明低息及高流動性，如果只是困在財資市場打滾炒賣，無法流向實體經濟，作用根本唔大，最叻只係做到推高通脹避免通縮。十年美債低見1.85厘歷史水平，向日本十年債的1.1厘走近一步，大家不禁會問，純粹的低息有用嗎？日本經濟迷失廿年，可見零息恒常化根本無大幫助，擔心美國經濟最後都係步日本後塵。

內地水緊多時，九月上旬新增貸款870億元人民幣，遠低過市場預期。負利率令民間資金不斷流出銀行體系，市場開始擔心內銀可能要提高存款息率留客，對淨息差有負面衝擊，招行（03968）急挫9.2%，工行（01398）都跌7.5%，認真誇張。

傳統智慧話，強勢股終極一跌係大市見底先兆，洗倉活動終於輪到「死剩種」電訊股，數碼通（00315）急跌17.4%，和電香港（00215）跌7.1%，聯通（00762）跌5.5%，中移（00941）跌2.7%。4隻電訊股都有唔同故事支持今年跑贏大市，受惠智能手機普及，數碼通同和電的數據收入增長，都遠遠高過設備折舊升幅，配合高派息政策，現價股息率在5.5厘樓上，相信調整過後，仍然係好息之徒的佳選。中移情況有點相似，高現金流量及吸引的股息回報，加上iPhone即將配合生產TD網絡制式手機，如果重返75元水平，已經夠吸引。

反而對估值稍高的聯通，筆者有點保留，儘管新增3G客戶的比例已經扭轉過往2G捱打的局面，但估值偏高下，建議保守的投資者不妨考慮趁調整換貨轉投中移。