股海實戰：最壞情況尚在後頭 博反彈未係時候

美國聯儲局會後提出的舉措不但未能振奮人心，相反更顯得技窮，美國人深知奧巴馬提出嘅刺激就業方案只會淪為新一場政治鬧劇，對前景極度悲觀之下，美股前晚狂瀉，並拖累全球股市，港股極速跌穿萬八點，恒指最多跌964點，收報17,911點，跌912點，成交831億元，災情嚴重！

對於近日有指大戶於場外對賭港股期權，以致市況極為波動。阿莊所聞，九月份場外並無大戶新開大金額嘅期權對賭，只係喺八月份有睇淡後市嘅中資大戶，同外資對賭場外期權喺九月計數，聽講期權金有一、兩億銀，計番槓桿賭注都唔細。但當然，場外交易之說無從證實，講嘅多半係做事後孔明，加上如今股市下跌係環球性而唔係港股獨有，淡友要喺場外再開賭注咁大嘅新合約，都幾難搵對手。

萬六防線將受考驗

講番大市，上月十日阿莊話，跌市最後防線喺16,000點，此刻再次重申睇法未有改變。不過，單講九月份，估計呢幾日踩到落17,500至17,800點水平經已差唔多，只係看官對短線反彈唔好作任何遐想，事關更大凶險喺未來兩個月出現，屆時阿莊所講嘅最後防線將備受考驗。

上星期五提到，年底前傳來有中型以上內房企業倒閉嘅消息，並唔出奇，近日市場確有傳聞指，有內房A股頂唔順，應付唔到周轉，可能要倒閉。尋日內房股股價跌勢甚急，雅居樂（03383）及碧桂園（02007）分別跌14.8及11.6%。唔想見嘅事情，終歸要發生，惟有做好心理準備迎接壞消息來臨。

內銀股空軍未收手

另外，呢排阿莊多次提到要小心嘅內銀股，尋日亦終於來一次「大清洗」，跌幅介乎5至9%，呢兩個月密手沽空內銀股嘅大戶真係豬籠入水！睇見尋日大市沽空金額達到96億元，沽空比率達11%，其中建行（00939）及農行（01288）嘅沽空額，分別有6億元及3.41億元，即係話班「空」軍仲未收手，本來諗住落到2.8至3元可以（目及）（目及）農行，依家都係改等見2.5至2.6元先至再算！

講開又講，尋日阿莊提及中行時，講到該行已叫停跟歐洲銀行嘅外匯交易，呢期眼見仍停留喺金魚缸嘅散戶，多半玩指數窩輪同牛熊證過日子，股海大風大浪，咁樣賭大細風險固然高，亦宜留意發行商嘅資金背景，提防歐洲銀行體系有咩冬瓜豆腐，會引發軒然大波。總結呢刻嘅心聲：往後一、兩年金融市場路難行，戒急用忍，少賭為妙！