樓市出更：全球超豪宅呎價港稱王

香港地少人多，住宅樓價連年飆升，頂級豪宅做價更達到令人咋舌嘅地步，用寸金尺土嚟形容，絕對唔誇張。

劉SIR收到一間國際代理行嘅最新報告，話去到今年六月為止，本港嘅超級豪宅平均呎價已經超過8萬元，比起舊年嘅排名再升一級，成為全球最貴城市，做價更加係英國倫敦嘅兩倍。

普樂道屋呎價9萬

根據第一太平戴維斯公布嘅報告，舊年十二月到今年六月期間，全球十個城市嘅超級豪宅，平均呎價升咗一成，比起期間各城市普通住宅只有6%升幅，明顯勝一籌。

而十個城市中，六個都喺亞洲區，其中，首位嘅香港平均呎價差唔多去到8.06萬元，半年間升咗一成，比起○五年十二月至舊年十月時嘅排名全球第二，依家升多一級，排全球首位。

事實上，香港唔少超級豪宅做價之高，真係意想不到，好似山頂普樂道10號洋房，今年五月發展商菱電發展以8億元售出。

計吓數，呎價超過9.6萬元，成為亞洲不可分割地段洋房新高價，唔少老外開頭都唔信，但始終事實歸事實，靚嘢唔憂賣。

祖國經濟起飛，樓市橋頭堡嘅上海市，逐步走向國際化，睇番份報告，上海超級豪宅做價最新排名維持全球第七位，平均每方呎差唔多萬六元，比起新加坡、印度孟買及澳洲悉尼仲要高。

東京做價十億壓眾國

海嘯影響下，日本東京超級豪宅市場仍然企得住，最新排名全球第2，平均呎價約6萬多元；期間區內豪宅單一做價差唔多10億元，成為全世界超級豪宅最貴城市。

另外，呢份報告仲有一樣好有趣嘅數字，就係香港超級豪宅做價雖然係全球最貴，但單位平均面積只係5,000方呎，比起俄羅斯莫斯科只係大少少。

悉尼超級豪宅面積最大，差唔多兩萬方呎，係香港嘅四倍。