期指攻略：中線走勢續向淡

話晒港股係環球資金嘅提款機，外圍有事，港股要企穩都幾難；在全球經濟風雨飄搖之時，必須對外圍形勢多點認識，對捕捉期指大方向亦有幾分幫助。

隔晚美股先跌後升，以為港股昨日假期後可以彈一彈，但最終得個「亂」字！事實上，歐債危機陰霾未退，加上意大利拍債成績不理想，令昨日恒指一度跌穿八月九日低位18,868點，如果只睇半日市，相信大部分人都會止蝕離場，但港股午後跌勢喘定並重新發力，最後半小時上升動力增加，全日最終升14點，收報19,045點，成功重返萬九點關之上，主板成交增至814億元，是連續第二個交易日上升，可見即市走勢如何反覆。

此外，早前提及期指即市低位逐步向上推進，但自本周一起港股裂口低開後，其實已破壞早前三底反彈形態，加上技術指標MACD亦從牛轉熊，14RSI回至35，中線走勢未能言勇。

策略上，昨日即月期指雖然高開於19,250點，但筆者見仍無力重返19,550點，故依計以三分一資金小注試沽，結果即月期指僅高見19,282點，最後收報18,997點，較現貨低水48點，走勢續淡。若然今日期指仍未能上破昨日高位19,282點，筆者更會考慮追沽，以免錯失食大茶飯嘅良機。