股海實戰：青島啤酒候低再考慮

美股中秋和追月都報升收場，可惜無助港股止跌，恒指尋日初段上過19,248點後升勢無以為繼，不久即掉頭向下，插穿上月低位，一直落到18,627點始企穩，尾段有反彈，全日收報19,045點，升14點，成交增至816億元。

屈指一算，恒指上上落落，全日波幅超過1,000點，即日跟炒搵食，除咗要「藝高人膽大」，仲要轉數夠快！市況異常飄忽，皆因全球宏觀經濟前景未明，傳統基金同長線投資者多半已清貨離場，仍留喺股市日炒夜炒嘅，就係班追求「絕對回報」嘅對沖基金，好淡互片情況時有發生，且變化甚快，若然唔想遭受池魚之殃，就要盡量忍手，冷眼旁觀！

極度恐慌尚未上演

阿莊喺八月十日提及，若全球確認再次進入衰退期，緊隨嘅跌浪要維持一、兩年，恒指最後防線將下調至16,000點水平，呢個睇法至今未變。事實上，綜觀目前香港消費層面尚未完全反映宏觀經濟嘅負面前景，樓市調整幅度亦有限，金魚缸極度恐慌、徹底悲觀嘅一幕尚未出現！

再睇內地，短期表現亦唔會好得去邊，皆因時值第三季尾，內銀須就存貸比率等各項目進行考查，加上下月起存款準備基準調整生效，內銀須於此前補繳準備金，而「十一」前夕亦係企業同居民提現嘅旺季，各項因素將令市場「水」源進一步趨緊，月內滬綜指2,400點關支持將備受考驗。

最近國企指數先於恒指跌穿五十二周低位，顯示中資股弱勢，但綜觀各個中資板塊，內需股表現仍算硬淨。以龍頭啤酒股青啤（00168）為例，八月以來股市大變天，但青啤股價仍跑贏恒指及國指，現價相對年初水平仍有進帳，原因全靠「內需」概念，從其上半年純利同比增長21.6%，至9.89億元人仔，可見經濟增速放緩對佢嘅影響有限。

業績持平已有交代

之不過，預期下半年嘅經營環境將遜於上半年，除咗與雪花啤酒嘅競爭白熱化外，毛利率持續受壓，亦對盈利增長構成風險，特別係第三季大麥價格持續向上，加上公司嘅低毛利率產品銷售佔比上升，下半年整體毛利率持續受壓幾成定局。若然全年業績能保持去年嘅水平，甚而有單位數字增長，經已算係交到功課！

青啤現價計往績市盈率尚有三十二倍，足以顯示出大品牌估值可享有溢價，但若然大市繼續探底，整體中資股估值進一步受壓，屆時青啤股價難免也將受到考驗。穩陣起見，可待回試去年初以來嘅三底（32至33元水平）支持，始作考慮。