魚缸Blogger：百麗發揮龍頭優勢
兩間法國銀行評級被降、希臘有秩序違約傳言不斷，歐債危機到咗生死存亡嘅地步，連金磚五國都要擔當救火隊嘅角色，喺下個禮拜商討援歐大計，而港股尋日亦驚心動魄，先跌穿今年低位18,868點，再勉強重上萬九關，後市走勢唔多好樣。
雖然百麗（01880）近日被管理層折讓配股，並瞬間失守配股價，但集團嘅基本因素唔曳。貴為內地鞋王，百麗喺女裝鞋市場穩佔逾四成嘅市佔率，銷售點逾萬個，即使業務發展成熟，但其今年上半年嘅純利仍按年增長29%，至20.07億元人民幣，以其市值逾千億元計，實屬難得，加上內地消費市場快速增長，百麗龍頭優勢可繼續發揮。
技術上，百麗尋日出現倒轉錘頭嘅利好訊號，短線向上主要阻力喺14.7元，支持就喺13.4元。
百麗（01880）
阻力位：14.7元
支持位：13.4元