新界樓加租封王

環球經濟表現不穩，市民置業信心亦受到影響，唔少市民選擇轉買為租，租金梗係愈扯愈高，代理資料顯示，上個月本港50個主要二手屋苑平均成交呎租再升1.3%至22.62元，已經連續升咗八個月，其中以新界區屋苑租金升幅較理想，好似荃灣麗城花園呎租做緊17.2元，按月大升9.6%。

尋日利嘉閣畀咗份最新資料給劉Sir睇，發現上個月本港50個指標二手屋苑租金再升1.3%，其中新界區升2.1%，而首八個月整體租金已經累升咗約8%。

新界七屋苑呎租揚

劉Sir仲發現，上月租金錄得升幅嘅30個屋苑，呎租升得最急嘅7個屋苑，全部集中新界區，當中有3個係荃灣屋苑，其中麗城花園呎租急升9.6%，去到17.2元。

至於同區愉景新城同荃灣中心亦升咗6.2及6%至18.9及17.7元。其餘大埔太湖花園及馬灣珀麗灣等呎租升幅介乎4.5至6.4%不等。

荃灣區代理老友美聯梁仲維同劉Sir講，荃灣區單位租金入場費便宜，單位類型大細都有，選擇較外區多，加上八月暑假為傳統租務旺季，盤源消化得快，租金自然發力上升啦。佢仲話，要搵細單位租盤，除咗荃灣同屯門外，市場供應認真有限。

大學生$7200租叠茵

真係有咁啱得咁蹺，屯門叠茵庭就做咗單高租金成交個案，美聯謝志遠稱，租盤買少見少嘅叠茵庭，有個1座中層兩房戶由一名嶺南大學學生以每月7,200元承租，租金水平相比上月底高咗4.3%，佢話依家該盤兩房放租盤只剩番3至4個。

美聯物業劉嘉輝都話，今年平均租金一直上揚，令首八個月月租過萬嘅租務個案比率顯著上升，佔整體租務成交69%，較去年全年62%水平，升7個百分點。