Fundman睇市：滙控短線難有作為

希臘正面臨債務違約危機，德國政府表明唔排除讓希臘有秩序破產，咁搞法個個借錢唔還有樣學樣，真係唔知點收科！法國銀行業擁有大量希臘資產，今鋪首當其衝，多家法國銀行面臨被下調信貸評級的風險，搞到前晚歐洲銀行股風聲鶴唳。究竟希臘能否順利獲批新一輪貸款，要視乎歐盟、IMF及歐洲央行派員視察後，月底所發表的報告能否讓其化險為夷！

昨日市場傳出，意大利財長與中國主權財富基金─中投的高層最近會面，並惹來中國擬出手購入大批意大利主權債務的揣測。事實上，站在中國的角度，呢個算盤打得響，一來可以藉此加強在歐洲的影響力，以抗衡美國，亦符合近年中國多番強調外匯儲備趨向多元化的策略；二來中國現時的外匯儲備亦有唔少歐元資產，幫手托一托亦有助改善組合表現。但筆者相信，在任何實際行動出現前，呢個傳聞對歐、美股市嘅刺激作用相當有限。

刺激就業舉步維艱

講番美國，呢頭奧巴馬宣布總值4,470億美元一籃子振興美國就業計劃，嗰頭就傳來美國銀行宣布擬裁減三萬個職位，相等於僱員總數的一成，以實現到一三年底前每年節省50億美元成本的目標，咁樣來回一加一減得番個「桔」！更何況如今共和黨每事對着幹，奧巴馬的方案能否通過國會一關尚屬未知之數，而闖關前後，全球金融市場難免會再有大動盪！

亡羊補牢，英國銀行獨立委員提出改革建議，在二○一九年前將國內銀行的零售和投資業務隔離（ring-fencing），並建議提高銀行資本率要求，以避免要再用納稅人的錢補貼銀行的高風險業務，此舉意味着銀行每年將額外增加最多70億英鎊開支，作為當地大型銀行嘅滙豐控股（00005），勢必受到影響。

歐洲及美國嘅金融業由盛轉衰已是不爭的事實，立足歐、美、新興市場的國際金融企業，本來網絡覆蓋全球係好事，多元化市場發展亦有助平衡風險，勢估唔到歐、美業務巨虧，縱使新興市場業務如何理想亦唔夠填氹。

好似滙控，近年的業績表現已說明呢個情況，早前高管宣布全球裁員計劃，呢個舉動與歐、美同業的「瘦身」要求睇齊，市場唔感到意外，但連為集團賺大錢的香港市場都要交出人頭，則引來打工仔齊聲譴責。

不過，史提芬站喺股東嘅角度，有另一睇法。在可見將來，歐、美銀行業持續收縮，監管趨嚴，經營十分困難，但喺勞工保障完善的西方國家，要大刀闊斧實施裁員阻力甚大，如今睇見連集團最賺錢的新興市場業務都要為配合集團裁員目標而交人，咁歐、美部門亦自然冇得推搪。

縱使過去滙控作風穩健，今次受歐、美市場的衝擊可謂史無前例，未來股價會繼續受到拖累，昔日威風已成往事，唯一可寄望的，是待時機成熟集團可能考慮分拆新興市場業務上市，但講緊嘅應該都唔會係一兩年內嘅事，故短期都難對呢隻「病獅」有太大期望。