股海實戰：煤氣等機會執平貨

今年金魚缸「大閘蟹」比陽澄湖大閘蟹更早上市！前日中秋股票大平賣，多隻藍籌股價創五十二周低位，滙控（00005）更跌至○九年七月以來新低，股海災情真係不堪入目。阿莊認為，恒指上月低位18,868點並非重要支持位，若失守該位，下一承接區要落到18,000至18,500點。總而言之，依家各位應該認真諗吓點樣「逃生」，而唔係逢低「溝貨」，別與錢作對！

新股鴻國（01028）本周一首日開始招股，咁啱遇上大跌市，聽講首日孖展捧蛋，有經紀睇見一時感觸，慨嘆「熊國」來臨。咁啱得咁蹺，舊年天源礦業亦擬用呢個新股靚冧「實（10）易發（28）」做上市編號，但結果天源宣布無限期擱置上市。究竟呢個股票編號真係「靚冧」定「黑冧」，就要等着瞧！

大行唱淡水泥股，皆因至今內地保障房興建速度未符預期，供需關係轉差，未來數月水泥價格續有下調壓力。屈指一算，月初以來，中國建材（03323）股價由高位累跌35%，真係走遲半步都一身潺，雖然短線已進入超賣區，但阿莊堅持唔係極度超賣唔出手嘅宗旨，會等見8.4至8.5元先作考慮。

另一個重災板塊係內銀股，上月下旬阿莊話隻農行（01288）幾次回升都上唔番4元樓上要小心，果然股價升唔上就掉頭試底，前日低位3.22元，招股價3.2元危危乎！中行（03988）仲慘，又再失守招股價2.95元，前日見散戶喺2.9元築起逾兩千個買盤護航，但歐股開市冇耐個「血肉長城」就畀大型沽盤炸散，最低見過2.88元，收市報2.9元。若未能喺短時間內重上3元關，則頗大機會下試2.6至2.7元支持。

避險不離公用股

咁嘅局面，要搵避險對象，不離公用股。中華煤氣（00003）盈利表現穩定，今年上半年賺32.2億元，扣除售樓溢利及投資物業重估增值之稅P:後溢利同比增長約16%。

煤氣喺香港嘅公用業務四平八穩，內地業務增長潛力則較大，連同屬下嘅港華燃氣（01083），目前集團已喺內地21個省、直轄市同自治區合共取得 127個項目，覆蓋上、中、下游項目，相信未來集團將透過購併繼續加快拓展內地市場，長遠而言呢瓣業務更有分拆獨立上市嘅條件。

該股現價18.34元，往績市盈率二十五倍，息率1.79厘，估值唔算太便宜，較理想嘅入市價喺15元水平，且看傳統股災月（十月）會唔會連公用股都大震盪，屆時就可以留意執平貨嘅機會。