樓市出更：住宅摸貨近絕迹

自從舊年政府推額外印花稅辣招後，啲炒家即時靜晒，而措施推出迄今就快一年，遏炒成效似乎唔錯，劉Sir睇番土地註冊處嘅最新數據，今季截至九月九日，只得78宗住宅摸貨買賣登記，地產代理估計最終唔會超過100宗，比起九七年第二季4,626宗嘅高位，相差成98%，比出招前都少咗近九成。

美聯張蓓蕾同劉Sir講，自從舊年十一月推出辣招之後，住宅摸貨數字就不斷咁跌，令到第三季住宅摸售登記宗數佔整體二手住宅註冊量比例跌至只有0.7%，係開徵「重稅」後連續三個季度唔夠1%，可以話住宅摸貨已經差唔多絕迹。

樓價升幅 難抵重稅

住宅摸貨其實分新盤摸貨、同二手摸貨兩種，睇番第三季嘅數據，由於過去一年好多二手物業嘅樓價升幅未必能夠抵銷15%額外印花稅，所以買入二手單位再摸出嘅個案實在少之又少，好似今季截至九月九日，此類個案暫時只錄得9宗登記，相信全季最終都只會得10多宗二手摸售註冊，相比起舊年第三季出招之前嘅464宗，足足暴跌超過九成。

細價樓摸售不足4%

至於一手摸貨，今季到依家暫時只有69宗註冊登記，由於好多都係買入遠期樓花新盤再轉售，所以普遍都有利潤，好似將軍澳領峯8座右翼高層戶今年七月底以442萬元摸出，原業主約一年半賺約32萬元。根據美聯嘅數據，今季錄得嘅78宗住宅摸貨中，成交價介乎200萬至500萬元個案最多，共50宗，佔比例64%，而500萬以上嘅則有25宗。

反而一向好炒嘅200萬或以下細價樓就只得3宗，佔比例唔夠4%。