市場徐想：李寧不宜太早論成敗

「體操王子」李寧無人不識，但講到佢嘅非凡「蛇吞象」就講咗一年。講嘅係一年前，非凡中國（08032）收購李寧手上30%李寧（02331）公司權益，但因為被港交所（00388）指為反收購，又話要咁做就要重新安排上市，例如要求過去兩年嘅經營現金流要超過2,000萬元，結果最終上訴都搞唔掂。由創業板嘅非凡，揸三成主板嘅李寧呢個做法，可以為非凡提供三成嘅盈/虧貢獻，又可以分享三成嘅淨資產值，公司即刻可以「升呢」，唔講得笑。大家都知非凡真係好多現金，但要令到公司更加實咗，呢個無疑係一個好方法。

有人話李寧想由實業家進軍資本家，但一開始就唔掂，我就覺得點可以一次論英雄。李寧嘅成功，並唔係一晚成事，經驗累積同樣係非常重要。唔成功，成個運動概念嘅大方向仍然不變。李寧今次形象又跌，外界認為佢不務正業，我就覺得李寧公司已經係一間好公司，市值又大，而非凡中國可能就係另一個新嘅驅動器。