Fundman睇市：信置股息回報見吸引

八月份美國就業數據令市場大失所望，美股急挫，港股尋日承接跌勢，恒指裂口低開382點後，全日反彈乏力，午後跌勢因滬綜指收市計，創今年新低，加上歐股低開帶動，恒指愈跌愈有，最後跌596點，報19,616點，成交577億，係過去一個月第二低紀錄，可是沽空成交卻不跌反升至71.3億，大戶做緊邊一面，一睇就知。技術上，恒指後抽見20,975點又再回落，尋日仲要留低19,830至20,178點的巨型下跌裂口，出現「孤島」見頂惡劣走勢，20,178點頸線務必要成功突破，後市先有運行。

港股跌幅2.95%，比上星期五道指2.2%跌幅仲要甘，要多得中海油（00883）唔少！旗下蓬萊油田被勒令停產的消息，令股價跌1.35元，收報13.84元，連埋除息因素，一隻股票令恒指唔見101點。

內地CPI數據關鍵

今個星期，股市焦點係周三德國憲法法院會就德國政府向希臘、愛爾蘭及葡萄牙等「歐豬」窮兄弟提供龐大紓困資金，是否違反歐洲公約及德國法律。以及周四美國總統奧巴馬公布一系列創造就業及降低聯邦政府預算赤字的計劃。

老實說，德國作為歐盟區老大，目前是騎虎難下，近季GDP增長顯示國內經濟急速放緩，但如果唔救PIIGS，歐盟隨時落得瓦解下場，問題更難處理。至於奧巴馬救市內容，更加難抱厚望，尤其為應付民主黨通過提高國債上限，限制未來政府開支以滿足削赤的要求，未來想大規模增加政府開支刺激就業，一定綁手綁腳，奉勸看官都無謂抱太大期望。筆者反而認為，祖國本周末之前會出八月份CPI，有留意必要，假如回落幅度較市場預期大（分析員估由6.5跌至6.1%），或者有通脹受到控制的言論，市場隨時炒人行掉轉頭下調存款準備金率救經濟。

講番本港，今日三幅官地拍賣，到底政府連番出招，八月環球股市小股災後，地產商點睇未來本地樓市發展，今日應該有多少指標作用，當中較矚目的將軍澳地皮，近日測量師行估值都陸續見到先行打折，介乎32億至40億元之間。

雖然近期樓市出現零星減價成交，有「頂頂哋」的味道，有趣的是，大部分地產股早在去年十至十一月見頂，例如上星期公布業績唔錯，又玩股民至愛送紅股一招的信置（00083），由去年高位跌近三成七，到底係樓市投資者睇錯市？抑或地產股捧場客過分悲觀？筆者都想知答案。

信置在本地發展商之中，股價向來波動性比較高，回顧過去十年，市帳率最高在○七年見過2.66倍，而十年前「九一一」事件發生之後，也見過0.29倍的低點，故目前在0.82倍，是否夠平，就真係見仁見智。不過，由去年初開始，大部分地產股嘅股息回報有改善趨勢，當然，這和股價回落有直接關係，以信置為例，去年現金股息回報達3.77厘，比過去十年股息平均及中位數回報2.27及2.03厘高一截，隨着地產股穩定的投資物業租金收益上升及更慷慨的派息，史提芬相信即使樓市短期真的出現震盪，在零息的環境下，地產股股價未必完全跟隨。