股海實戰：北控伺機執平貨

港股昨日如期低開，但跌幅較預期大，恒指曾低見19,567點，收報19,616點，跌596點，成交卻只有577億元。表現咁弱，皆因美股昨晚休市，買家駐足觀望，搞到大市缺乏承接，股份跌勢亦頗全面，總之一句講晒：「冇得玩」！

魚缸缺水難有運行

A股亦唔好得去邊，尋日滬、深兩市主板總成交唔夠1,100億元人民幣，滬綜指收報2,478點，跌1.96%。近日中金亦預計，九月下旬A股市場資金面會明顯收緊，連大靠山都自顧不暇，香港金魚缸點會有運行？阿莊喺度諗，股市表現一向行先經濟約半年，睇見呢期股市咁弱，真係擔心明年經濟會更差，故建議大家有錢就咪手痕亂投金魚缸，見唔到心儀實力股股價超低殘，都唔諗博反彈。

今日特區政府公開拍賣分別位於將軍澳、元朗及西貢嘅三幅住宅地皮，由於近期本地銀行對於放貸予本地企業態度審慎，寧備留信貸額度給內地客以賺取較高嘅回報。喺考慮到攞line難，相信中小型發展商投地意欲唔高，但呢三幅地皮論晒士同地點，未必有太多大發展商有興趣，所以對今日賣地成績唔好抱太大期望。

上周本欄分析過上海實業（00363），今日睇睇另一隻實力紅籌北京控股（00392）。近年積極拓展燃氣業務嘅北控，今年上半年營業收入同比僅微增2.7%，至156億元；純利同比增長5.6%至16.5億元；每股盈利1.45元，派中期息每股25仙，整體表現只屬平穩。綜觀各項業務表現，天然氣業務除稅後溢利達到11.55億元，佔總額70%；啤酒及水務業務分別貢獻2.6億元及2.58億元，收費道路嘅貢獻則為4,532萬元，故可以用大半隻燃氣股來看待呢隻大紅籌！

中期業績增長放慢，主要係首季北京市平均氣溫同比顯著偏高，影響取暖用氣需求，加上陝京三線去年底投產後攤銷折舊費用大增及財務費增加，幸好啤酒業務（燕京啤酒）得益於銷量增加、產品結構調整及有效成本控制，令經營溢利穩步增長，加上水務業務發展亦較快，抵銷了對業績的影響。

阿莊估計，今年北控整體增長會放慢，但相對其他大起大落嘅股類，其收益基礎仍相對穩定，政策不明朗因素亦較少。以現價計一一年度預測市盈率約十六倍，今年以來股價累跌近三成，雖然已算係Big Sale，但依家整個股市估值下調壓力日增，此股現價估值亦唔算十分便宜，會耐心等候Final Sale嘅來臨！