何超雄西區再掃貨

最近樓市有啲波動，搞到唔少人都唔敢入市，不過對於城中嘅大家族嚟講就當然冇咩影響，好似年初出現家族風波嘅何鴻燊家族，今年上半年鮮聞喺物業市場有咩舉動。不過，自從風波平息之後，最近何氏成員喺物業市場又好似活躍番。劉Sir知道冇入貨一輪嘅何家大房的何超雄，最近就買入西區縉城峰一個極高層單位。

何超雄買入嘅縉城峰1座極高層B室，面積約1,568方呎，成交價3,500萬元，由於個單位相當優質，所以呎價超過2.2萬元。其實佢今次已經係第二次涉足西區新盤市場，早喺○五年泓都開售時，何氏就動用約3億元買入該盤約72個單位，其後亦陸續獲利將單位賣出。

沽Branksome賺逾七千萬

何超雄一向都有投資物業，最矚目嘅交易就係○四年以約1.3億元，買入中半山Branksome Crest一個連平台同私人泳池嘅相連戶，由於當時樓市經過○三年沙士一劫，樓價跌到相當低殘，當時願意大額攞超過1億元買一個豪宅單位嘅人唔多，所以當時成交爆出之後，引起市場一輪追訪，至於個單位舊年以2.03億元賣出，六年間帳面賺約7,300萬元。

講開何氏家族，部分家族成員近幾個月都有喺市場出貨，好似何鴻燊最近就將揸咗幾十年嘅上水古洞一幅可作「綜合發展」用途嘅農地部分業權，以約4.4億元賣咗畀建生國際（00224）吳氏家族或有關人士旗下基金。

至於四太梁安琪近呢幾個月就以收割為主，多數係出貨，不過早幾個月有傳聞，話佢罕有地涉足九龍塘屋地市場，以近1.9億元買入區內一幅獨立屋地，當時每方呎樓面地價逼近2.9萬元。