股海實戰：上實宜分注收集

雖然近日標普及惠譽雙雙就歐洲經濟形勢轉差發出預警，但呢期壞消息當好消息炒，歐美經濟睇得愈淡，股市就挾得愈爽！尋日恒指一度試叩21,000點關，大戶盡殲恒指熊仔，但目前恒指牛仔街貨唔係好多，話唔定短線大市會繼續喺高位徘徊，等完成派發先至又再掟過！

國壽不具溝貨理據

個股方面，眾人愛股中國人壽（02628）走勢持續疲弱，尋日逆市跌2.35%，收報19.1元。持貨者心大心細想溝貨，可予理解，但其實隻股基本因素未見改善，溝貨行動缺乏充分理據支持，若然真係想低吸保險股，建議轉移視線至基本因素較佳嘅平保（02318）。

內地八月份製造業PMI為50.9%，環比回升0.2個百分點。究竟內地經濟放緩速度是否正在減慢，個人認為尚要觀望九月份數據始能下判語。唔講唔知，原來內地商家幾睇重呢個九月嘅市道，皆因成個第三季交唔交到數都係睇呢個月，一旦情況比預期差，更可能會影響到末季嘅市場氣氛。中金公司最近發表報告，指內地房地產板塊已進入震盪築底期，睇好九月反彈行情，並建議趁低吸納個別龍頭企業。

地產業務收益可觀

講到內房，阿莊又想起紅籌上海實業（00363）。近幾年上實除本身經營嘅消費、公路、基建水務等業務外，還加大力度拓展內房業務。今年上半年營業額同比跌17%，至55.28億元，正係由於房地產業務銷售放緩所致，但若扣除去年同期出售醫藥業務嘅特殊收益，期內純利實際同比增1.49倍至30.23億元，反映實際情況唔係表面睇咁差。

短期上實股價仍受內房政策陰霾左右，但即使假設下半年缺乏房地產業務收益，現價預測市盈率才八倍，更何況實際上房地產業務會持續提供可觀收益。再睇公司現價26.1元，往績息率達4厘，而截至六月底每股資產淨值30元。橫睇豎睇數據都唔係差，只係阿莊仍然認為市底偏淡，故呢啲價唔會急於入場，年底前再次逼近五十二周低位22.5元，會認真考慮分注收集。