摸王出貨賺少啲都賣

上個星期揭盅嘅北角油街地王，不單止未能締造百億佳績，反而以下限估價賣出，令市場跌到成地眼鏡，北角樓市經此一震，區內有部分資深投資者都要減價出貨，好似「摸王」黎汝遠最近就將部分有一定賺幅，又或者日後升值潛力一般嘅住宅貨出售，佢日前就率先以約1,750萬元賣出嘅和富中心單位，累積減價約330萬元。

黎汝遠同劉Sir講，住宅樓價過去已累積咗一定升幅，所以考慮沽出部分物業，實行套現換股，或再購入其他工商物業，由於受到油街地成交價以低於預期影響，近日亦減價出售部分已有錢賺嘅單位。

揸一年帳賺163萬

佢又話，好似北角和富中心，最近由於外牆進行裝修，所以較難吸引租客，所以日前將其中一個8座高層面積約1,537方呎單位放盤。

佢話呢個單位叫價由約2,080萬元，減到去約1,780萬元，經議價後再減到約1,750萬元賣出，呎價約1.1萬元，持貨約一年帳面賺163萬元，賺幅約一成。

入貨只買超筍盤

摸王話，現時佢喺北角區仍然持有至少8至10個住宅單位，由於租金可以抵銷供樓嘅開支，所以已出租嘅單位暫時唔急於出售，加上低息及通脹環境下，「揸磚頭」仍然較實際，極優質住宅物業樓價依然可以睇升，不過，依家除非搵到超平筍盤，否則暫時未有入貨嘅打算。

而油街地成交價低於市場預期，的確對區內樓市帶嚟啟示，世紀21日昇黃文龍就話，好似之前樓景單位曾經做過呎價逾8,000元嘅健威花園，最近有一個D座低層1室樓景單位，面積507方呎，喺業主減價50萬元後，以約360萬元賣出，呎價7,100元。