短炒倉：國航 有力追落後

正所謂「人算不如天算」，雖然有點老土，但又實在係不少人現實生活中嘅寫照，就算喺股市中，亦不乏「估佢唔到」嘅例子。就好似鐵路股咁，今年年頭當全世界都高唱「高鐵概念」，認為航空股冇運行，誰不知接二連三嘅不利消息，反而令高鐵概念股跌入谷底。

相反，當日被視為必然輸家的航空股，反而迎來了好運，不但高鐵搶客不成，加上油價下跌，以及人民幣升值，幾大利好因素，令航空股紛紛起飛，其中又以內地航線比重較高的南航（01055）及東航（00670）表現較佳，現價分別較五十二周低位回升達68%及31%，相反國航（00753）就較遜一籌，以昨日收市價7.87元計，只較低位6.72元高出17%。

負面因素已反映

三家公司均已先後公布中期業績，結果亦同股價表現相符，國航因來自燃油對沖的公允值收益大減88.9%，拖累純利倒退12%，相反南航同東航，盈利均有三成左右的增長。

不過基於國際油價近月續見回落，紐約期油日前更一度跌至84美元樓下，而人民幣匯價就持續強勢，既然利好內航股的相關因素未有改變，相信作為龍頭的國航，在市場消化業績欠佳的因素後，股價有機會追落後，月初高位8.39元為阻力所在，向下支持位7.5元。

國航（00753）

阻力位：8.39元

支持位：7.50元