股海實戰：四環有力再彈

隔晚美股延續近日升勢，道指收市再升20點，連帶港股亦有運行，恒指高開之後喺20,200點窄幅水平徘徊，晏晝三點幾升幅一度收窄至唔夠100點，但臨近尾市動力又告轉強，恒指埋單升330點，以20,534點收市，突破八月中高位20,504點，不過整個八月計，恒指仍然跌咗1,905點，跌幅8.45%。

近日港股走勢相對較強，即使早幾日內地股市下挫，港股亦未有理會，繼續跟住外圍升。其實個市呢幾日咁強，相信是市場上有太多「空軍」，大戶乘機挾淡倉有關，假如班淡友挾得七七八八，到時唔排除又攞番美國及歐洲債務危機來做藉口再插過。

數碼通強得有道理

早排跌市，電訊股可以話係資金避難所，唔信可以睇睇中移（00941）、和記香港（00215）等，股價完全無受股災影響，反地心吸力繼續高位徘徊，大孖沙當佢哋債券咁狂掃，一來貪現金流強勁兼高息，再者，智能電話普及，人人手執一部搭車又篤，搭船又篤，電訊商嘅數據收入根本易升難跌，唔信？不妨攞番部五年前淨係能夠打出打入嘅手機嚟用，睇下閣下可以忍到幾多日？

業績期屆尾聲，數碼通（00315）尋日收市後出成績表，完全解釋到點解股價可以強成咁。賺7.54億元，超出分析員預測的6.5億至7.2億元範圍，主要受期內數據收入大升81%，客戶每月消費上升所帶動，數碼通亦繼續賺幾多派幾多的豪氣作風，每股賺0.73元全部派番畀股東，以尋日收市價14.74元，相當於股息率4.95厘，連中電（00002）股息都未到3厘，零息年代，簡直係退休人士或者孤兒寡婦收息過日辰的佳選。

加速收購壯大規模

同樣受業績消息推動嘅，仲有早排跌得好殘嘅醫藥股，四環醫藥（00460）由於中期多賺49%，刺激股價升13.85%，以3.04元收市。睇番四環業績，上半年9.9億元收入裏面，有42%來自新收購業務，而公司仲話未來會加大收購，相信可藉此加快公司發展，進一步壯大規模，難怪會受追捧。

另外，神威（02877）盈利雖然僅增長4%，但維持派息，支持股價急升11.64%，以11.12元收市。事實上，不少醫藥股之前都係因發改委限制醫藥產品價格而下挫，已經跌過龍，所以短期絕對有條件趁佳績繼續反彈。