甲廈交投慘過海嘯

政府去年推出連串壓抑樓市措施，主要針對住宅市場，所以寫字樓市場表現唔錯，不過自從上月環球出現小型股災，令人擔心香港嘅經濟受影響，有做開寫字樓買賣嘅地產代理同劉Sir講，八月份生意慘淡，成個月商業核心區甲級寫字樓買賣只係得10宗，成交量比七月份大減約五成，有地產行家估計生意額按月倒退超過六成，情況衰過金融海嘯初期。

聽市場嘅老友講，上月港島中區甲級寫字樓只係錄得零星成交，連埋尖沙咀區計，主要核心區甲級寫字樓買賣都係得10宗，相對今年三月時高位47宗，急挫近79%。

不過，期內依然有部分大額成交，好似資深投資者黎汝遠，就以約1.37億元「摸出」金鐘力寶中心1座部分樓面，呎價約1.68萬元。

買賣回升要待明春

紀惠集團湯文亮同劉Sir講，環球經濟前景未見穩定，加上銀行對非住宅的按揭仍然保守，現時業主減價都未必收效，令到近期寫字樓買賣放緩，相信要去到明年農曆新年後嘅傳統小陽春期間，寫字樓買賣成交先會受惠回升。

租務市場影響有限

有代理呻，上個月本港整體工商舖市道放緩，其中，甲級寫字樓買賣成交更大減，情況屬於近年罕見，依家市場已經出現僧多粥少情況，估計八月份整體寫字樓代理生意按月或減少約六成。

雖然買賣交投減少，但租務市場就暫時唔受影響，租金仲愈升愈有，置地公司執行董事周明祖同劉Sir講，其實歐美債務危機對香港商廈市場影響有限，香港甲級寫字樓始終供應少需求大，對租金梗有支持啦。

佢仲以集團喺中區嘅零售及寫字樓樓面為例，截至今年六月底止，零售與寫字樓物業嘅平均呎租約141.7及85.6元，創下歷史高位。