短炒倉：華南城 潛力大爆發

經營工業原材料物流交易中心業務嘅華南城（01668），旗下嘅深圳華南城，相信華南一帶嘅「廠佬」都冇乜邊個會未去過。集團○九年上市，過去三個年度盈利穩步增長，早前公布截至三月底止全年業績，期內收入增加42.3%至22.3億元，股東應佔溢利15.52億元，同比增長16.8%，每股盈利0.26元，以昨日收市價1.25元計，市盈率只係4.8倍。

按業務性質，華南城屬商業物業發展同收租股一類，跟一般內房股大有分別，亦不受內地壓抑樓市政策影響。集團過去只得深圳華南城一個項目，收入來源或稍嫌單薄，但隨着河源華南城落成，加上南昌、西安同南寧項目都會在未來幾個月開售，收入可望出現爆發性增長，集團管理層就表示，預計本財政年度可實現銷售額達70億至90億元，較去年度收入增幅達兩至三倍。

配合業務步入收成期，集團目前正在新加坡進行路演，稍後再到歐洲，可望提高知名度同引起外資基金嘅興趣，即使新項目毛利率及不上舊有項目，但按保守預測今年盈利30億元，每股盈利0.5元計，預測市盈率僅2.5倍，相當吸引。

華南城（01668）

阻力位：1.40元

支持位：1.17元