股海實戰：億和跨過逆境再出發

國壽（02628）業績差強人意，股價挫逾一成，最慘前兩日唔少散戶撲入國壽CALL輪諗住博業績，結果可以話係滑鐵盧；即使係長揸正股，眼見股價一度插穿20元，一樣咁心痛，心諗政府派六千蚊都唔夠買膠布！

平保（02318）尋日有兩宗交叉盤上板，金額合共約77.8億元，聽講話係同大戶場外對賭平倉活動有關，扣除相關金額，尋日大市成交唔到680億元。經驗股友唔怕股市大上大落，最怕係見到股市「陰乾」，市場憧憬美國QE3可以刺激環球股市，希望呢個唔係「美麗的誤會」！

尋日工業股億和控股（00838）亦派成績表，截至今年六月底止半年營業額增加7.1%，至8.79億元，純利同比倒退25%至1.04億元，每股盈利6仙，派中期息每股1.8仙。

億和主要為日本辦公室自助化設備品牌客戶生產模具及零部件，由於今年三月日本大地震，對公司定單造成影響，原有生產計劃部署被打亂，增產效益未現但成本開支增加，故期內盈利倒退實乃預期之內嘅表現。

早前公司取得日本客戶一系列「綜合定單」，相關嘅新型號產品已於五月推出市場，雖然首批產量較預期低，但能協助客戶喺地震後短時間內推出新產品，料可進一步鞏固其競爭優勢。

積極開拓內需市場

近年管理層亦意識到側重單一業務嘅風險，故積極研究開拓內需市場，今年七月以6,102萬元人仔收購重慶一家汽車模具公司，期望能涉足高增長嘅內地消費品市場。此舉方向正確，但短期貢獻有限。

由於要應付中山新廠以及深圳新生產大樓嘅投資，期內投資活動所用現金增逾兩倍至1.88億元，幸好三月公司成功配股集資2.84億元，故見截至六月底之手持淨現金尚處歷史新高，達3.72億元。

阿莊仲好記得，喺○八年金融海嘯期間，呢隻工業股喺最差嘅時候仍然有錢賺，憑着技術、專業和穩健作風，贏得要求甚高嘅日本客戶信任，去年度公司純利更創下3億元嘅佳績。今年日本大地震，原先估計嘅增長周期要延後，並再次考驗公司嘅抗逆能力。中期業績中，公司引述部分主要客戶認為，「日本大地震最壞的階段已經過去，同時增長將可能復甦」，且觀望下半年嘅復甦步伐。

坦白講，呢兩個月全球經濟變化甚大，唔排除今次逆境時間，會較預計來得長，公司股價亦可能尚有下調壓力，可幸公司根基良好，若然能夠安度逆境，藉着生產規模擴大，以及發展策略多元化嘅效益，將可帶領公司往後業績再創高峰。