短炒倉：中電信 業績對辦

港股連續第二日反彈，升幅更達2%，一舉收復10日線。由前日憂慮萬九關不保，到尋日挑戰19,900點，市況變化之急速，一個唔好彩兩日都企錯邊，左一巴右一巴，隨時仲傷過單邊大跌市。

近期市況疲弱碰啱業績期，結果出現業績唔好要跌，業績好一樣要跌嘅情況，不過尋日公布中期業績嘅中電信（00728）就例外，集團中期盈利撇除初裝費後有97億元人民幣，升10.2%，符合市場預期，股價收市升4.7%，收報4.6元。

iPhone可成催化劑

近幾個月來，有關三大內地電訊商嘅消息，都係圍住iPhone打轉，從種種迹象睇嚟，當稍後iPhone5推出時，三大電訊商將人人有份，但聯通（00762）因一早已經有，刺激自然冇咁大，至於中移（00941），礙於TD制式關係，跟iPhone嘅「合拍度」仲有待觀察，因此計落相信都係以中電信嘅得益最大。

睇番中期業績，期內中電信嘅移動用戶達1.08億戶，較去年底淨增長19.7%，而當中3G用戶增長更達75.3%，至2,154萬戶，可見增長勢頭持續。股價近日於4.3元有形成雙底迹象，阻力位睇5元，中線而言，集團表示會向母公司收購網絡資產，加上一旦引入iPhone消息落實，都可望成為推動股價向上的催化劑。

中電信（00728）

阻力位：5.0元

支持位：4.3元