股海實戰：華創吼筍價上車

港股尋日早段見全日低位後便掉頭重拾升軌，A股回升至近全日高位收市，帶動恒指下午抽穿19,800點，收報19,875點，升388點，成交回落至746億元。

不過，睇深滬兩市主板成交唔到1,300億元人仔，反彈市缺乏交投支持，至於港股亦唔好得去邊，特別係超跌股反彈力水有限，唔少股份更懶理升市繼續尋底，所以阿莊對呢浸反彈市有所保留。

股份洗倉潮沒完沒了，與反覆走高嘅恒生指數形成對比，難怪唔少股友都話感受唔到升市氣氛，更有部分爛炒友沽完股票止蝕，轉去炒指數PUT輪或熊證，結果呢兩日都撞晒大板，慘變「雙輸」！

陸續有企業公布業績，比亞迪（01211）中期盈利倒退逾八成，股價急挫逾14%，昔日被基金視為明日之星，如今卻成力沽對象，做唔成「紅底股」，唔知幾時連「花蟹價」都不保！

兩隻內地食品股——旺旺（00151）及康師傅（00322）同日宣布中期，純利分別同比增3.6%及15.8%，股價雙雙走低。細看業績，期內兩家公司收入均錄得增長，但毛利率卻分別下跌5.1及4.89個百分點，主要受原材料及勞工成本不斷上升影響，相信下半年毛利率受壓會更加明顯，未來六個月估值會有下調壓力，宜轉觀望，勿輕率沾手。

論穩陣之選，華創（00291）依然係阿莊心目中嘅實力股。還記得早喺五月下旬本欄已指出，華創業務多元化，四平八穩，當時股價約31.3元，現價31.15元，相對於同期恒指累跌逾一成，表現強於大市。

行業整合領軍者

今年以來，華創積極擴展百貨及啤酒業務版圖，包括向母公司購入深圳華潤堂全部股權、收購江蘇大富豪啤酒49%及上海亞太啤酒全部股權、增持杭州西湖啤酒及浙江湖洲啤酒至全資擁有、與茅台啤酒組合營、並與麒麟共拓非酒精飲料，積極擔當行業整合嘅領軍者。

華創將於本周四公布中期業績，估計盈利可保持穩定增長，而喺購併效益逐步展現下，盈利前景穩定。喺預計淡市將維持一段較長時間下，相信華創可繼續發揮抗跌本色，料股價波幅區介乎29至35元水平。但補充一句，非常時期要用非常心態看待，呢期人心虛怯，個股表現如「神經刀」，若然大戶真係有心玩嘢，嚟緊業績前後來個震倉，不妨留意低位承接，睇睇有冇筍價上車！