樓市出更：「大款」收割掟豪宅狠絕

近年內地人來港蜂擁買豪宅，成為本港樓市背後嘅大水喉，大部分只買不賣，但隨住內地同本港銀行「閂水喉」，同埋樓價升咗唔少，內地客開始「收割」；上半年內地客沽二手豪宅比例，佔整體6.9%，較舊年下半年多1.4個百分點，沽售物業中以九龍站豪宅三寶佔較多，包括九龍站天璽、凱旋門等，成為內地客主要出貨目標。

劉Sir攞到一份地產代理嘅數據，睇到今年上半年內地客以個人名義購買本港二手豪宅嘅宗數同金額比例，分別佔6.9%同7.9%，分別較舊年下半年多咗1.4同1.2個百分點，其中宗數比例更創○七年有紀錄以來新高，可以睇到多咗內地人沽貨套現。

九龍站三寶掟貨重災

近年內地人大多鍾情九龍站嘅二手豪宅，今年上半年以來，九龍站三寶包括九龍站天璽、凱旋門同擎天半島合共佔內地客個人沽貨數量同金額都係最大，三寶涉及嘅內地人轉售宗數及金額，合共有12宗及3.44億元，佔內地人主要沽售的五項豪宅中嘅52巴仙同超個60個巴仙，其中天璽沽售金額及宗數已佔去1.78億元同5宗。

貝沙灣半年8宗居首

另外，以單一豪宅計，港島南區嘅貝沙灣，上半年有8宗內地客沽售單位個案，屬涉及宗數最多嘅屋苑，涉及金額約1.75億元。至於西區寶翠園亦有上榜，但涉及金額及數量只有半億同3宗。

雖然近排多咗內地人出貨，但買一、二手豪宅的內地客仍然唔少，今年首半年內地個人豪宅買家佔28.9個巴仙，較舊年下半年升咗2.1個百分點，較舊年下半年有成3.6個百分點增幅，升幅略有放緩，不過仍然係有紀錄新高，當中九龍站三寶佔成交金額超過14億，宗數佔52宗。